গুৱাহাটী ২৭ ছেপ্টেম্বৰ: মহানগৰীৰৰ জয়ানগৰস্থিত অসম তৃণমূল কংগ্ৰেছৰ মুখ্য কাৰ্যালয়ত সংবাদমেল । সংবাদমেল সম্বোধন কৰে অসম তৃণমূল কংগ্ৰেছৰ মিডিয়া বিভাগৰ অধ্যক্ষ দিলীপ কুমাৰ শৰ্মাই ।
সংবাদমেলত দিলীপ কুমাৰ শৰ্মাই মঙলবাৰে অসম তৃণমূল কংগ্ৰেছৰ সভাপতি ৰিপুণ বৰাই তৃণমূল কংগ্ৰেছৰ সাধাৰণ সম্পাদক অভিষেক বেনাৰ্জীৰ সৈতে বহা বৈঠকৰ সৱিশেষ দাঙি ধৰে ।
শৰ্মাই আগন্তুক লোকসভা নিৰ্বাচনত 'I.N.D.I.A.' মৰ্চাৰ অংশীদাৰ দল হিচাপে ৫ খন আসন বিচৰাৰ সন্দৰ্ভত অসম তৃণমূল কংগ্ৰেছৰ সভাপতি ৰিপুণ বৰা আৰু তৃণমূল কংগ্ৰেছৰ সাধাৰণ সম্পাদক অভিষেক বেনাৰ্জীৰ মাজৰ বৈঠকত সিদ্ধান্ত হোৱা বুলি সংবাদমেলত সদৰী কৰে ।
লগতে অহা নৱেম্বৰ মাহত পশ্চিমবংগৰ মুখ্যমন্ত্ৰী মমতা বেনাৰ্জীক অসমলৈ আহিবলৈ অসম তৃণমূল কংগ্ৰেছৰ সভাপতি ৰিপুণ বৰাই প্ৰস্তাৱ আগবঢ়োৱাৰ কথা শৰ্মাই সদৰী কৰে । আনহাতে পশ্চিমবংগৰ টালিগঞ্জত থকা সুধাকণ্ঠ ড° ভূপেন হাজৰিকাৰ বাসগৃহটো ঐতিহ্যমণ্ডিত স্থান হিচাপে ঘোষণা কৰি উন্নত ৰূপত সংৰক্ষণৰ ব্যৱস্থা কৰিবলৈ পশ্চিমবংগ চৰকাৰৰ ওচৰত ৰিপুণ বৰাই দাবী জনোৱাৰ কথাও অসম তৃণমূল কংগ্ৰেছৰ মিডিয়া অধ্যক্ষ শৰ্মাই প্ৰকাশ কৰে ।
এই ক্ষেত্ৰত ইতিমধ্যে পশ্চিমবংগ চৰকাৰে ড° হাজৰিকাৰ বাসগৃহটো ক্ৰয় কৰি নিজৰ অধীনলৈ অনা বুলি সংবাদমেলত মন্তব্য কৰে শৰ্মাই । বিষয়টো সন্দৰ্ভত সভাপতি ৰিপুণ বৰাই টালিগঞ্জৰ বিধায়ক তথা পশ্চিমবংগ চৰকাৰৰ শক্তি মন্ত্ৰী অৰূপ বিশ্বাসৰ লগতো মিলিত হৈ আলোচনা কৰে ।
সংবাদমেলতে বক্তব্য ৰাখি অসম তৃণমূল কংগ্ৰেছৰ সাধাৰণ সম্পাদক (প্ৰশাসন) গজেন্দ্ৰ প্ৰসাদ উপমন্যুয়ে মধুপুৰ সত্ৰৰ উন্নয়নৰ বাবে সভাপতি ৰিপুণ বৰাই জনোৱা দাবীসমূহৰ বিষয়ে বিতংকৈ কয় ।
‘‘সভাপতি ৰিপুণ বৰা ডাঙৰীয়াই মধুপুৰ সত্ৰক ইক’ আৰু ধৰ্মীয় পৰ্যটনৰ কেন্দ্ৰ হিচাপে গঢ়ি তোলাৰ দাবী জনায় । লগতে সত্ৰীয়া কলা-সংস্কৃতিৰ কেন্দ্ৰস্থল হিচাপেও গঢ়িবলৈ দাবী জনায় । সত্ৰলৈ অহা ভক্ত আৰু তীৰ্থযাত্ৰীসকলৰ থকাৰ সুবিধাৰ ব্যৱস্থা কৰিবলৈও বৰাই দাবী জনায় । আনহাতে মহাপুৰুষ শ্ৰীমন্ত শংকৰদেৱৰ সত্ৰীয়া কলা-সংস্কৃতিৰ, সাহিত্যৰাজিৰ উপযুক্ত সংৰক্ষণৰ বাবে এটি পুঁথিভৰাল সংলগ্ন সংগ্ৰহালয় নিৰ্মাণৰো দাবী জনায়,’’গজেন্দ্ৰ প্ৰসাদ উপমন্যুয়ে কয় ।
