গুৱাহাটী, ৫ জুন: ধ্বংসৰ মুখলৈ গতি কৰিছে মহানগৰীৰ বৰছলা বিল (Borsola Beel Guwahati)। ৰাজ্য চৰকাৰে বৰচলা বিল পুতি আৰম্ভ কৰিবলৈ বিচাৰিছে জাৱৰ নিষ্কাশন প্ৰকল্প (Sewage treatment plant in Borsola Beel) । এই কথা পোহৰলৈ অহাৰ পাছতে জাঙুৰ খাই উঠিছে স্থানীয় ৰাইজ, বৰছলা বিল উন্নয়ন সমিতি ।
সংৰক্ষিত জলাশয় পুতি এই প্ৰকল্প আৰম্ভ কৰিবলৈ বিচৰাত তীব্ৰ ক্ষোভ প্ৰকাশ কৰিছে স্থানীয় ৰাইজে । বৰছলা বিলত জাবৰ নিষ্কাশনৰ প্ৰকল্পৰ নিৰ্মাণ বন্ধ কৰিবলৈ চৰকাৰক দাবী জনায় ৰাইজে । অন্যথা উচ্চ ন্যায়লয়ৰ কাষ চপাৰ হুংকাৰ দিয়ে । চলাবিল উন্নয়ন সমিতি সম্পাদক বিপ্লবানন্দ চৌধুৰীয়ে কয় যে, ২০০০ চনত গুৱাহাটী উচ্চ ন্যায়ালয়ে দিয়া ৰায়ৰ পৰিপ্ৰেক্ষিতত ২০০১ চনত জিলা প্ৰশাসনে বৰছলা বিলক সংৰক্ষিত জলাশয় হিচাবে ঘোষণা কৰিছিল ।
ইপিনে ২০০৮ ত গুৱাহাটী জলাশয় সুৰক্ষা আৰু সংৰক্ষণ আইনৰ অধীনত সংৰক্ষিত জলাশয় হিচাবে বৰছলা বিল অন্তৰ্ভুক্ত হৈছিল । তাৰ পাছতো বিলৰ বহু মাটি ব্যক্তিগতভাৱে বেদখল হোৱাৰ উপৰিও বন বিভাগ, পৰ্যটন নিগমে বিলৰ মাটিত অট্টালিকা নিৰ্মাণ কৰিছে । শেহতীয়াভাৱে বিলৰ মাটিত চৰকাৰে জাৱৰ নিষ্কাশন প্ৰকল্প নিৰ্মাণ কৰাৰ পৰিকল্পনা কৰা হৈছে । যোৱা ৫ দিন পূৰ্বে জাবৰ নিষ্কাশণ প্ৰকল্প নিৰ্মাণ কৰিব বুলি হৰ্ডিং লগোৱাৰ পাছতে সমগ্ৰ ঘটনা পোহৰলৈ আহিছে ।
বৰছলাবিল উন্নয়ন সমিতি সম্পাদক বিপ্লবানন্দ চৌধুৰীয়ে কয়,‘‘ এই সিদ্ধান্তৰ আমি বিৰোধিতা কৰিছো । কিয়নো সংৰক্ষিত জলাশয় বুলি গুৱাহাটী উচ্চ ন্যায়লয়ে দিয়া ৰায়ৰ সম্পূৰ্ণ বিপৰীতে জাবৰ নিষ্কাশন প্ৰকল্প নিৰ্মাণৰ পৰিকল্পনা কৰিছে । এই বিষয় সন্দৰ্ভত বিভাগীয় কৰ্তৃপক্ষৰ লগত আলোচনা কৰিম ৷’’
উল্লেখ্য যে, স্মাৰ্ট চিটি প্ৰজেক্টৰ(Guwahati Smart City Project) অধীনত ১২০ কোটি টকাৰে বৰছলা বিলৰ সৌন্দৰ্য বৰ্ধনৰ(Development of Borsola Beel) কাম হাতত লৈছিল যদিও আজিলৈ তাৰ কোনো কাম আৰম্ভ নহ’ল । ৬৫ বিঘা মাটিত থকা বিলখনৰ দৈঘ্য প্ৰায় এক কিলোমিটাৰ । কিন্তু সম্প্ৰতি বেদলখল হৈ বিলখনৰ ৫০ বিঘাও মাটি নাই । বিলৰ মাটি চৰকাৰী বেচৰকাৰীভাৱে বেদখল হৈ থকাৰ অভিযোগৰ লগতে নতুনকৈ জাৱৰ নিষ্কাশন প্ৰকল্প নিৰ্মাণ কৰি বিলখনৰ পাৰিপাৰ্শ্বিকতা ধ্বংস কৰিব ওলোৱা হৈছে বুলি অভিযোগ উত্থাপন কৰিছে স্থানীয় ৰাইজে ।
লগতে পঢ়ক: এমাহৰ পিছতো গুৱাহাটীৰ উন্নয়নৰ বাবে কোনো নতুন আঁচনি লোৱা নাই গুৱাহাটী পৌৰ নিগমে
