গুৱাহাটী, 15 আগষ্ট: অসম ৰাজ্যিক দুৰ্যোগ ব্যৱস্থাপনা প্ৰাধিকৰণে মঙলবাৰে প্ৰকাশ কৰা তথ্য মতে বানত মঙলবাৰে কোনো লোকৰ মৃত্যু হোৱা নাই । এতিয়ালৈকে চলিত বছৰৰ বানত মৃত্যু হোৱা লোকৰ সংখ্যা ১৪ জন । সোমবাৰে শোণিতপুৰ জিলাত দুজন লোকৰ মৃত্যু হৈছে । বানৰ তাণ্ডৱ কিছু পৰিমাণে হ্ৰাস পাইছে যদিও সম্প্রতি বানৰ কৱলত আছে ৰাজ্যৰ আঠখন জিলা ।
বিগত দেওবাৰে শিৱসাগৰত বানত এজন লোক মৃত্যু হোৱাৰ পিচত শোণিতপুৰত দুজন লোকে বানত প্ৰাণ হেৰুৱায় । ইপিনে নামনি অসমত বেকী নদী সোমবাৰে বিপদসীমাৰ উপৰেৰে বৈ আছিল যদিও মঙলবাৰে বেকী নদী বিপদসীমাৰ তলেৰে বৈ আছে ।
উজনি অসমত ব্ৰহ্মপুত্ৰ নদী বিপদসীমাৰ উপৰেৰে বৈ আছে । অসম ৰাজ্যিক দুর্যোগ ব্যৱস্থাপনা প্ৰাধিকৰণে জনোৱা মতে, চিৰাং, দৰং, ধেমাজি, ডিব্ৰুগড়, গোলাঘাট, কোকৰাঝাৰ, শিৱসাগৰ জিলাৰ ১৫ টা ৰাজহ চক্ৰৰ ২৪৭ খন গাঁও এতিয়া বানৰ কৱলত আছে । বানৰ ফলত প্ৰভাৱিত হৈছে ৪৫ হাজাৰ ৭৭৪ জন । ধেমাজি আৰু শিৱসাগৰ জিলা বানৰ ফলত সৰ্বাধিক প্ৰভাৱিত হৈছে ।
ধেমাজিৰ ২৪,৭৫৪ জনআৰু শিৱসাগৰৰ ১৫,৬৫০ জন সম্প্রতি জলবন্দী হৈ আছে । আনহাতে, ৬,১৩৬ হেক্টৰ কৃষিভূমি বানত বুৰ গৈ আছে । শিৱসাগৰৰ আঠটা বান আশ্রয় শিবিৰত সম্প্ৰতি ১,২১৯জন বন্যার্তই আশ্ৰয় লৈ আছে ।
ইফালে বৰঝাৰত থকা বতৰ বিজ্ঞান কেন্দ্ৰৰ তথ্য মতে অহা ২৪ ঘন্টাত অসমৰ বিভিন্ন ঠাইত পাতলীয়া বৰষুণ হ'ব । আকৌ ঠায়ে ঠায়ে ব্ৰজপাতৰ হৈ বেছি বৰষুণ হোৱাৰ সম্ভাৱনা আছে ।
