গুৱাহাটী, 10 আগষ্ট: তৃতীয় আৰু চতুর্থ শ্ৰেণীৰ পদ পূৰণৰ বাবে অনুষ্ঠিত হ'বলগীয়া পৰীক্ষা (Assam Direct Recruitment 2022 ) সন্দৰ্ভত আলোচনা কৰাৰ উদ্দেশ্যৰে বুধবাৰে মুখ্যমন্ত্ৰী ড৹ হিমন্ত বিশ্ব শৰ্মাৰ উপস্থিতিত পৌৰোহিত্যত জনতা ভৱনস্থিত মুখ্যমন্ত্ৰীৰ সভাকক্ষত এক বৈঠক অনুষ্ঠিত হয় (Assam CM chairs meeting on III, IV vacancies recruitment process) । উল্লেখ্য যে, অসম মাধ্যমিক শিক্ষা পৰিষদ (ছেবা)ৰ (Board of Secondary Education) দ্বাৰা এই পৰীক্ষা অনুষ্ঠিত হ'ব । আগন্তুক ২১ আগষ্টত চতুৰ্থ বৰ্গৰ আৰু ২৮ আগষ্টত তৃতীয় বৰ্গৰ পৰীক্ষা অনুষ্ঠিত হ’ব ৷
আনহাতে ৰাজ্যখনৰ ২৪ খন জিলাত চতুৰ্থ বৰ্গৰ আৰু ২৫ খন জিলাত তৃতীয় বৰ্গৰ পৰীক্ষা অনুষ্ঠিত কৰা হ'ব । বৈঠকত মুখ্যমন্ত্ৰীয়ে সমগ্ৰ নিযুক্তি প্ৰক্ৰিয়া সুচাৰুৰূপে পৰিচালনা কৰাৰ বাবে বিষয়াসকলক নিৰ্দেশ দিয়ে । তেওঁ শীর্ষ বিষয়াসকলক লিখিত পৰীক্ষাৰ দিনা যাতে কোনো ধৰণৰ অনিয়ম সংঘটিত নহয়, তাৰ বাবে প্ৰয়োজনীয় সকলো ধৰণৰ পদক্ষেপ গ্ৰহণ কৰিবলৈ নিৰ্দেশ দিয়ে ।
মোবাইল ফোন আদি সামগ্ৰী লৈ কোনো প্ৰাৰ্থীয়ে যাতে পৰীক্ষা গৃহত প্ৰৱেশ কৰিব নোৱাৰে সেইটো সুনিশ্চিত কৰিবলৈ গৃহ আৰু ৰাজনৈতিক বিভাগৰ বিষয়াসকলক তেওঁ নিৰ্দেশ দিয়ে । আনহাতে, মুখ্যমন্ত্ৰীয়ে আৰক্ষী সঞ্চালক প্ৰধানগৰাকীক প্ৰতিখন জিলাতে আৰক্ষী অধীক্ষক পৰ্যায়ৰ এগৰাকী বিষয়াক জিলাখনৰ সকলো পৰীক্ষা কেন্দ্ৰৰ সুৰক্ষাৰ সামগ্ৰিক দায়িত্ব প্ৰদানৰ বাবেও কয় ।
তেওঁ লগতে প্ৰতিটো কেন্দ্ৰতে উপ-পৰিদৰ্শক পৰ্যায়ৰ একো একোগৰাকী বিষয়াক দায়িত্ব দিবলৈ নিৰ্দেশ দিয়ে । অসৎ উপায় অৱলম্বন কৰা, উৰা বাতৰি বিয়পোৱা দৰে প্ৰথাৰ আশ্ৰয় লোৱাসকলৰ বিৰুদ্ধে তেওঁ শূন্য সহনশীল নীতি গ্ৰহণ কৰিবলৈ কয় । নিকা নিযুক্তি প্ৰক্ৰিয়াৰ জৰিয়তে নিৰ্বাচিত হোৱা মেধা সম্পন্ন যুৱক-যুৱতীসকলে ৰাজ্যখনৰ চৰকাৰী প্ৰশাসন ব্যৱস্থাটোৰ লক্ষ্যণীয় পৰিৱৰ্তন সাধন কৰিব পাৰিব বুলি উল্লেখ কৰি মুখ্যমন্ত্ৰীয়ে কয় যে কঠোৰ পৰিশ্ৰমৰ দ্বাৰা চাকৰি লাভ কৰা প্ৰাৰ্থীসকলে শ্ৰমৰ মৰ্যাদা সঠিকভাৱে উপলব্ধি কৰিব পাৰিব ।
এনে প্ৰার্থীসকলে কৰ্তব্যৰ প্ৰতি সচেতন হোৱাৰ লগতে অনৈতিক কাৰ্যৰ পৰা বিৰত থাকিব বুলিও তেওঁ কয় । বৈঠকত আৰক্ষী সঞ্চালক প্ৰধান ভাস্কৰজ্যোতি মহন্ত, ৰাজ্য চৰকাৰৰ শীৰ্ষ প্ৰশাসনিক আৰু আৰক্ষী বিষয়া তথা ৰাজ্যিক পৰ্যায়ৰ নিযুক্তি আয়োগৰ বিষয়াসকল উপস্থিত থাকে ।
লগতে পঢ়ক: Assam Mizoram border dispute: হিমন্ত বিশ্ব শৰ্মাক দিল্লীত লগ কৰিবলৈ আগ্ৰহী জোৰামথাংগা
