গুৱাহাটী, 14 জুলাই : অসম বিধানসভাৰ বাজেট অধিৱেশনৰ আজি তৃতীয় দিনা ৷ অধিৱেশনৰ তৃতীয় দিনাও বিশেষভাৱে সৰৱ হোৱা দেখা গ'ল শিৱসাগৰৰ বিধায়ক অখিল গগৈক । ৰাজপথৰ সংগ্ৰামৰ পৰা প্ৰথমবাৰৰ বাবে জনপ্ৰতিনিধি হিচাপে বিধানসভাৰ মজিয়ালৈ অহা অখিল গগৈক লৈ প্ৰত্যেক দিনাই সদনত উত্তপ্ত হোৱা দেখা গৈছে ।
বিধায়ক অখিল গগৈক লৈ আজিও উত্তাল হৈ পৰে বিধানসভাৰ মজিয়া ৷ বিৰোধীসকলৰ মতে অখিল গগৈক 'জ'কাৰ' বুলি কোৱা হৈছে । গগৈক জ'কাৰ বোলা কথাটোৰ তীব্ৰ বিৰোধিতা কৰে কংগ্ৰেছ নেতা ৰকিবুল হুছেইন আৰু ভৰত নৰহে ।
উল্লেখ্য যে, বিজেপি বিধায়ক মানৱ ডেকাই সদনত অভিযোগ উত্থাপন কৰিছিল যে, অখিল গগৈয়ে সদনত কৰা প্ৰশ্নৰ উত্তৰ সদনত উত্থাপন হোৱাৰ পূৰ্বে ৰাজহুৱা কৰিছিল ।
মানৱ ডেকাৰ এই অভিযোগৰ লগে লগে অখিল গগৈয়ে কয়-' কোনটো ৰুলছ মতে নোৱাৰি মোক জনাওক ৷ মই নাজানো' ৷ অখিল গগৈৰ এই মন্তব্যৰ পিছতে অখিলক আক্ৰমণৰ লক্ষ্য কৰি লয় মন্ত্ৰী পীযুষ হাজৰিকা আৰু বিধায়ক জয়ন্ত মল্ল বৰুৱাই ।
মন্ত্ৰী পীযুষ হাজৰিকাই অখিল গগৈক আক্ৰমণ কৰি কয় - 'নতুন বিধায়ক, কিবা কোৱাৰ আগতে শিকি ল’ব লাগে ৷ বাহিৰত ডাঙৰ মানুহ হ'ব পাৰে ৷ সদনত কথা সুকীয়া' ৷
মন্ত্ৰী হাজৰিকাৰ মন্তব্যৰ প্ৰতিক্ৰিয়াত অখিল গগৈয়ে প্ৰশ্ন কৰি কয় -'সদন কি চৰকাৰী পক্ষৰহে নেকি? সদন কেৱল শাসক পক্ষৰহে নেকি ?' সেই সময়তে নলবাৰীৰ বিজেপি বিধায়ক জয়ন্ত মল্ল বৰুৱাই কয় - 'এয়া আন্দোলনৰ স্থান নহয় ৷ এয়া সদন' ৷
লগতে সংযোগ কৰি মন্ত্ৰী পীযুষ হাজৰিকাই কয় -'সদন আন্দোলনৰ বাবে নহয় ৷ এনেকৈ চলিব দিয়া নহ'ব' ৷ আনহাতে, সদনৰ নিয়ম নমনা বুলি অভিযোগ কৰি বিধায়ক অখিল গগৈক কঠোৰ সমালোচনা কৰে অধ্যক্ষ বিশ্বজিত দৈমাৰীয়ে ।
অধ্যক্ষ দৈমাৰীয়ে কয় -' সদনৰ বাহিৰত যি ইচ্ছা ক'ব পাৰে, কিন্তু সদনত সকলোৱে আইনমতে কথা ক'ব লাগিব' ৷ ইয়াৰ পাছতো অখিল গগৈয়ে অধ্যক্ষক 'মোক কিয় কথা ক'ব নিদিব' বুলি পুনৰাই প্ৰশ্ন কৰাত অধ্যক্ষই কয় - 'কালি আপুনি বহুত সময় কথা কৈছে । আপোনাৰ সময়ত আপুনিও কথা ক'ব পাৰিব' ৷
অধ্যক্ষৰ এই মন্তব্যৰ পিছতে সদনত হাঁহিৰ ৰোল উঠে আৰু কোনোবাই অখিল গগৈক উদ্দেশ্যি 'জ'কাৰ' কোৱা বুলি অভিযোগ কৰে বিৰোধীয়ে । পৰিৱেশ হুলস্থুলীয়া হোৱাত 'এই শব্দ সদনৰ ৰেকৰ্ডত নাযায়' বুলি মন্তব্য কৰে অধ্যক্ষই । লগতে 'অখিল গগৈৰ কোনো কথা ৰেকৰ্ড নহয়' বুলিও মন্তব্য কৰে অধ্যক্ষই ।
লগ লগে মুখ্যমন্ত্ৰী হিমন্ত বিশ্ব শৰ্মাই থিয় হৈ স্পষ্টীকৰণ দি কয় - 'আচলতে জয়ন্ত মল্ল বৰুৱা আৰু মই ব্যক্তিগতভাৱে কথা কোৱাৰ সময়ত জ'কাৰ শব্দটো ব্যৱহাৰ হ'ল ৷ বাকী কাকো কোৱা নাছিল' ৷ মুঠতে অধিৱেশনৰ তৃতীয় দিনাও উত্তাল হৈ পৰে সদন ৷
লগতে পঢ়ক: সংকটে লগ এৰা নাই বিধায়ক অখিল গগৈৰ
