গুৱাহাটী, 13 নৱেম্বৰঃ মাৰ্ঘেৰিটা আৰু লিডুৰ কয়লা ছিণ্ডিকেট সন্দৰ্ভত বৃহৎ তথ্য ফাদিল অখিল গগৈৰ ৷ কৃষক মুক্তি সংগ্ৰাম সমিতিৰ কাৰ্যালয়ত এক সংবাদমেল সম্বোধন কৰি কৃষক নেতা অখিল গগৈয়ে সংবাদমাধ্যমৰ আগত মাৰ্ঘেৰিটা আৰু লিডুৰ কয়লা ছিণ্ডিকেটৰ ন-ন তথ্য পোহৰলৈ আনে ৷ উল্লেখ্য যে, বিভিন্ন বনাঞ্চলত কৃষক মুক্তিৰ এটা দলে এই সম্পৰ্কে তদন্ত কৰাৰ পিছত পোহৰলৈ আহিছে বহু তথ্য । সংবাদমেলত প্ৰজেক্টৰৰ সহায়ত অখিল গগৈয়ে দেখুৱালে অবৈধ কয়লা খননৰ বিভিন্ন ঘাটিসমূহ । অবৈধ খননঘাটি সমূহত কেনেকৈ বৰ্তমানেও হাজাৰ হাজাৰ শ্ৰমিকৰ দ্বাৰা কয়লা খনন হৈছে এনে বহু তথ্য এটা এটা কৈ দেখুৱাই দিয়ে কৃষক নেতাজনে ৷
লগতে তেওঁ কয় যে, কৃষক মুক্তিৰ RTI প্ৰতিবেদনৰ পিচতে বন বিভাগে প্ৰকাশ কৰে ঠায়ে ঠায়ে চলি থকা অবৈধ খননৰ সত্যতা ৷ মাৰ্ঘেৰিটাৰ আৰক্ষী বিষয়া মুনিন্দ্ৰ শৰ্মা আৰু তেওঁৰ পুত্ৰ প্ৰিন্স শৰ্মাৰ পৃষ্ঠপোষকতাত চলিছে এই অবৈধ খনন ৷ কয়লা কঢ়িওৱা প্ৰতিখন বাহনৰ পৰা এবাৰত লোৱা হয় 500 টকাকৈ উৎকোচ ৷ COAL INDIA, বন বিভাগ, অসম পুলিচ তথা চৰকাৰৰ বিষয়ববীয়ালৈ যায় ছিণ্ডিকেটৰ টকাৰ ভাগ ৷ ইয়াৰোপৰি লেখাপানীৰ আৰক্ষী বিষয়া পুৰঞ্জয় বৰাই ছিণ্ডিকেট চলোৱাৰ নামত কমিচন লোৱাৰ কথাও সংবাদমাধ্যমৰ আগত প্ৰকাশ কৰে অখিল গগৈয়ে ৷
আনহাতে বহুকেইজন অবৈধ বন মাফিয়াৰ নাম উল্লেখ কৰি মুখ্যমন্ত্ৰী সৰ্বানন্দ সোণোৱালৰ ছত্ৰছায়াতে এই সমগ্ৰ ছিণ্ডিকেট চলি থকা বুলিও মন্তব্য কৰে কৃষক নেতা অখিল গগৈয়ে ৷ লগতে তেওঁ এই চিণ্ডিকেটৰ বিষয়ে কেৱল কৃষক মুক্তিয়ে নহয় কংগ্ৰেছেও বহুবাৰ অৱগত কৰিছে বুলিও উল্লেখ কৰে ৷ এই কয়লা চিণ্ডিকেটৰ CBI তদন্তৰ দাবী উত্থাপন কৰি অখিল গগৈয়ে কয় যে, কয়লা ছিণ্ডিকেট বন্ধ কৰিব নোৱাৰিলে মুখ্যমন্ত্ৰীৰ বাসগৃহৰ সন্মুখত কৃষক মুক্তি সংগ্ৰাম সমিতিয়ে তীব্ৰ প্ৰতিবাদ সাব্যস্ত কৰিব ৷
আৰু পঢ়কঃ প্ৰদূষণৰ বিৰুদ্ধে বাইহাটাত প্ৰতিবাদ
