গুৱাহাটী, 14 অক্টোবৰ : 36 বছৰীয়া হ'ল অসম গণ পৰিষদ । 1985 চনৰ 14 অক্টোবৰত গোলাঘাটত জন্ম লোৱা ৰাজ্যৰ এই বৃহৎ আঞ্চলিক ৰাজনৈতিক দলটোৱে 35 টা বছৰ গৰকিলে । 6 বছৰীয়া অসম আন্দোলনৰ ফলশ্ৰুতিত 855 জন শ্বহীদৰ কেঁচা তেজৰ মূল্যৰ বিনিময়ত 1985 চনত আন্দোলনকাৰী নেতৃত্ববৰ্গ আৰু ভাৰত চৰকাৰৰ মাজত স্বাক্ষৰ হৈছিল 'অসম চুক্তি' । সেই অসম চুক্তিকেই ভেঁটি হিচাপে লৈ 1985 চনৰ 14 অক্টোবৰত এক আবেগিক পৰিৱেশ পৰিস্থিতিৰ মাজত গঠন হৈছিল 'অসম গণ পৰিষদ' দল । এক কথাত অসম চুক্তিয়েই আছিল অসম গণ পৰিষদৰ আত্মা ।
ইফালে, দল গঠন হোৱাৰ পিচত অসম গণ পৰিষদ দুবাৰকৈ দিছপুৰৰ ৰাজপাটত বহিল । প্ৰায় দহ বছৰ অসমত চলিল অসম গণ পৰিষদৰ শাসন । কিন্তু দুবাৰকৈ চৰকাৰ গঠন কৰাৰ পিচতো অসম চুক্তিৰ সঠিক ৰূপায়ণ কৰিব নোৱাৰিলে এই দলটোৱে । ইয়াতকৈ ডাঙৰ ব্যৰ্থতা আৰু কি হ'ব পাৰে ।
লগতে পঢ়ক : মধ্য প্ৰদেশত বিবাদঃ গুৰুতৰভাৱে আঘাতপ্ৰাপ্ত ৯ গৰাকীকৈ লোক
অসম চুক্তিত উল্লেখ থকা কেতবোৰ বিষয় কাৰ্যকৰী হ'ল ঠিকেই । কিন্তু চুক্তিৰ যি মূল বিষয়বস্তু বিদেশী বহিস্কাৰ সেয়া কাৰ্যকৰীকৰণত এই দল আৰু চৰকাৰ শোচনীয়ভাৱে ব্যৰ্থ হ'ল । চুক্তিৰ আধাৰত অসমত শংকৰদেৱ কলাক্ষেত্ৰ স্থাপন কৰা হ'ল, নুমলীগড় শোধনাগাৰ স্থাপন হ'ল, কেন্দ্ৰীয় বিশ্ববিদ্যালয় স্থাপন হ'ল, কিন্তু বিদেশী বহিস্কাৰ বা তাৰ সৈতে জড়িত বিষয় বিলাকৰ কোনো ধৰণৰ সমস্যা সমাধান নহ'ল ৷
আনহাতে, অসম গণ পৰিষদৰ চৰকাৰৰ কাৰ্যকালত বিদেশী বহিস্কাৰ হ'ল মাত্ৰ 1500 গৰাকী । ভাৰত-বাংলাদেশ সীমান্ত চীল কৰাৰ কথা আছিল অসম চুক্তিত । এই দলৰ দুবাৰকৈ চৰকাৰৰ কাৰ্যকালত সেয়াও সম্ভৱ হৈ নুঠিল । অসম চুক্তিত স্পষ্ট কৈ উল্লেখ কৰা আছিল যে, 1961 চনৰ পৰা 1971 চনলৈকে যিসকল সন্দেহজনক নাগৰিক তেওঁলোকৰ ভোটাধিকাৰ দহ বছৰৰ বাবে কৰ্তন কৰা হ'ব । সেয়াও কাৰ্যকৰী নহ'ল ।
লগতে পঢ়ক : বিধায়কসহ ১৫ গৰাকী নেতাক বহিষ্কাৰ কৰিলে জেডিইউৰ নেতা নিতীশ কুমাৰে
অসম চুক্তিৰ 6 নং দফাত খিলঞ্জীয়া লোকৰ সাংবিধানিক ৰক্ষা কৱচৰ বিষয়টো জড়িত হৈ আছে, সেই দফাটোও অসম গণ পৰিষদ চৰকাৰে কাৰ্যকৰী নকৰিলে । তেন্তে অসম চুক্তিৰ আধাৰত অসমক বিদেশী মুক্ত কৰিবলৈ 35 টা বছৰে অসম গণ পৰিষদে কি কৰিলে সেয়া প্ৰশ্নৰ আৱৰ্তত !
লগতে পঢ়ক : আত্মীয়ৰ জীৱন বচাবলৈ গৈ নিজৰ জীৱনলৈ বিপদ মাতিলে হেমন্তই
