গুৱাহাটী, ১ আগষ্ট: অসমৰ মুঠ জনসংখ্যাৰ ১.০১ কোটি লোকে দৰিদ্ৰ সীমাৰেখাৰ তলত বাস কৰে । এই তথ্য প্ৰকাশ পাইছে ৰাজ্যসভাৰ মজিয়াত । ৰাজ্যসভাত দাখিল কৰি তথ্য অনুসৰি অসমৰ ৩১.৯৮ শতাংশ লোক দৰিদ্ৰ সীমাৰেখাৰ তলৰ । তথ্য অনুসৰি অসমৰ গ্ৰাম্যাঞ্চলৰ ৩৩.৮৯ শতাংশ লোক অৰ্থাৎ ৯২.০৬ লাখ লোকে দৰিদ্ৰ সীমাৰেখাৰ তলত বাস কৰে । সেইদৰে চহৰাঞ্চলৰ ২০.৪৯ শতাংশ অৰ্থাৎ ৯.২১ লাখ লোকে দৰিদ্ৰ সীমাৰেখাৰ তলত বাস কৰে ।
লক্ষণীয় বিষয় যে চুবুৰীয়া কেইবাখনো ৰাজ্যৰ তুলনাত অসমত দৰিদ্ৰ সীমাৰেখাৰ তলত বসবাস কৰা লোকৰ সংখ্যা বেছি । অসমৰ ৩১.৯৮ শতাংশ লোক দৰিদ্ৰ সীমাৰেখাৰ তলৰ হোৱাৰ বিপৰীতে চুবুৰীয়া ৰাজ্য মেঘালয়ৰ ১১.৮৪ শতাংশ, মিজোৰামৰ ২০.৪০ শতাংশ, নাগালেণ্ডৰ ১৮.৮৮ শতাংশ, ত্রিপুৰাৰ ১৪.০৫ শতাংশ আৰু পশ্চিমবংগৰ ১৯.৯৮ শতাংশ লোকে দৰিদ্ৰ সীমাৰেখাৰ তলত বাস কৰে । ৰাজ্যসভাৰ এই তথ্যই অসম প্ৰকৃত স্বৰূপটো উদঙাই দিছে ।
যিটো সময়ত মুখ্যমন্ত্রী হিমন্ত বিশ্ব শৰ্মা চৰকাৰে অসমক দেশৰ পাঁচখন ৰাজ্যৰ ভিতৰত এখন ৰাজ্য হিচাপে গঢ় দিয়াৰ সপোন দেখিছে সেই সময়তে ৰাজ্যখনে দৰিদ্ৰতাৰে যুঁজ দিবলগীয়া হৈছে । দেশৰ ভিতৰতে এখন দৰিদ্ৰ ৰাজ্য হিচাপে পৰিগণিত হোৱা অসমক দেশৰ শ্ৰেষ্ঠ পাঁচখন ৰাজ্যৰ ভিতৰত এখন ৰাজ্য হিচাপে গঢ় দিয়াৰ সংকল্পৰ কথা মুখ্যমন্ত্রী হিমন্ত বিশ্ব শৰ্মাই সততে সদৰি কৰে । কেৱল সেয়াই নহয় আন কেইবাটাও দিশত অসমৰ শোচনীয় অৱস্থাৰ বাস্তৱ ছবিখন উন্মোচিত হৈছে ।
প্ৰধানমন্ত্ৰী নৰেন্দ্ৰ মোদীয়ে অসমসহ উত্তৰ-পূৰ্বাঞ্চলক অষ্টলক্ষ্মী বুলি সম্বোধন কৰে। কিন্তু বাস্তৱত অসমক অষ্টলক্ষ্মী হিচাপে প্ৰতিষ্ঠা কৰাত বিজেপি চৰকাৰে কোনো উদ্যোগ গ্ৰহণ কৰা নাই । যাৰ বাবে ৰাজ্যখনৰ প্ৰায় ৩২ শতাংশ লোকে দৰিদ্ৰ সীমাৰেখাৰ তলত বাস কৰিবলগীয়া হৈছে । ইফালে জনমূৰি আয়ৰ ক্ষেত্রতো অসম আন ৰাজ্যৰ তুলনাত বহু পিছপৰি আছে । লক্ষণীয় বিষয় যে জনমূৰি আয়ৰ ক্ষেত্ৰত অসম দেশৰ একেবাৰে শেষৰ ফালে দ্বিতীয় স্থানত আছে । এই তথ্যও শেহতীয়াকৈ ৰাজ্যসভাৰ মজিয়াত উন্মোচিত হৈছে ।
