টীয়ক,20নৱেম্বৰঃ মঙলবাৰে নিশা অহা এজাক প্ৰচণ্ড ধুমুহাত টীয়কৰ ঐতিহাসিক জাঁজীমুখৰ চোমনি চাপৰিত এজোপা প্ৰকাণ্ড বৰ গছ উভালি পৰাৰ লগে লগে উন্মোচিত হ'ল পৌৰাণিক এক তথ্য । উভালি পৰা বৰগছ জোপাৰ বক্ষত আহোম যুগৰ এটা গম্বুজ পৰিত্যক্ত অৱস্থাত উদ্ধাৰ হোৱা ঘটনাই চাঞ্চল্যৰ সৃষ্টি কৰিছে সমগ্ৰ অঞ্চলটোতে ।
উল্লেখযোগ্য যে, পুৰণিকলীয়া ইটাৰে নিৰ্মিত এই গম্বুজটো বিলুপ্তপ্ৰায় বৰআলিৰ ওপৰত অৱস্থিত । কথিত আছে স্বৰ্গদেউ প্ৰতাপ সিংহৰ ৰাজত্ব কালত নেঘেৰিটিং শিৱ মন্দিৰৰ পৰা ৰজাঘৰলৈ বুলি গড়গাঁৱলৈ নিৰ্মালি আনিছিল বৰআলিয়েদি । এই বৰআলিতে জাঁজীমুখৰ সমীপত আহোম ৰজাৰ নিৰ্দেশত নিৰ্মাণ কৰিছিল এই গম্বুজটো। কিন্তু কালক্ৰমত উপযুক্ত সংৰক্ষণৰ অভাৱত জহি-খহি যাব ধৰা এই গম্বুজটোৰ গাতে গজি উঠা বৰগছ জোপাই আৱৰি পেলাই গম্বুজটো । পুৰাতত্ব বিভাগৰ চৰম অৱহেলাৰ বাবে ঐতিহাসিক সম্পদৰ জৰাজীৰ্ণ ৰূপ ধাৰণ কৰাৰ অভিযোগ উঠিছে । ইপিনে ঐতিহাসিক গম্বুজটো চাবলৈ অঞ্চলটোৰ বহু লোক সমবেত হৈছে ৷ সম্প্ৰতি অতি শীঘ্ৰে ঐতিহাসিক এই সম্পদ সংৰক্ষণৰ দাবী জনাইছে সচেতন ৰাইজে ।
