টীয়ক, 28 ছেপ্টেম্বৰ: টীয়কত মহামাৰী কৰ’ণা ভাইৰাছৰ পৰা পৰিত্ৰাণ সন্দৰ্ভত আয়োজন কৰা হয় এক সজাগতাৰ সভা । এই সজাগতা সভাত টীয়কৰ বিভিন্ন স্থানত মাস্ক, ছেনিটাইজাৰ বিতৰণ কৰা পৰিলক্ষিত হৈছে ৷
উল্লেখ্য যে, 'ৰেঙনি এটি আশা'ৰ উদ্যোগত তথা অৰ্ণদা চছিঅ' ইকনমিক হেলথ এছ'চিয়েছনৰ সহযোগত টীয়কৰ তামূলীচিগা দুলীয়া গাঁৱৰ নামঘৰত আয়োজন কৰা হয় এই সজাগতা সভা । এই সজাগতা সভাত উপস্থিত থাকে কৰ্কট ৰোগ বিশেষজ্ঞ টীয়কৰ সন্তান ডা: যদুনাথ বুঢ়াগোহাঁই, যোৰহাট জিলা সাংবাদিক সন্থাৰ সভাপতি ৰিজু কুমাৰ শইকীয়া । ইপিনে উক্ত সভাত দক্ষিণপাট আশ্ৰমী সত্ৰৰ সত্ৰাধিকাৰ জনাৰ্দন দেৱ গোস্বামী বিশেষভাৱে উপস্থিত থাকি আধ্যাত্মিকতা ভাৱধাৰাৰ মাজেৰে স্বাস্থ্য সম্বন্ধীয় সজাগতাৰ ওপৰত মন্তব্য আগবঢ়ায় ।
ইপিনে উদ্যোক্তাসকলে প্ৰতিজন উপস্থিত ৰাইজক এটাকৈ ছেনিটাইজাৰ, একোখনকৈ মাস্ক আৰু সমাজকৰ্মী মনজিৎ শৰ্মাই আগবঢ়োৱা এটাকৈ ভিটামিন ঔষধৰ বটল বিনামূলীয়াকৈ বিতৰণ কৰে । ইফালে টীয়ক সেৱা ভাৰতীৰ উদ্যোগত টীয়কৰ কাকজান সোণাৰী গাঁৱতো প্ৰায় দুই শতাধিক মহিলাৰ মাজত বিনামূলীয়াকৈ ডা: যদুনাথ বুঢ়াগোহাঁইৰ সহযোগত মাস্ক আৰু ছেনিটাইজাৰ বিতৰণ কৰে । চিকিৎসা সেৱাৰ লগত জড়িত এইগৰাকী ব্যক্তিয়ে দৈনিক ব্যস্ততাৰ মাজতো মহামাৰী তথা দুৰাৰোগ্যৰ পৰা কিদৰে পৰিত্ৰাণ পাব পাৰি তাৰ সজাগতা সন্দৰ্ভত ৰাইজৰ মাজত উপস্থিত হোৱাৰ বাবে বিশিষ্ট চিকিৎসকগৰাকীক সকলোৱে ধন্যবাদ জনাইছে ।
লগতে পঢ়ক :আইপিএল 2020 : চেন্নাইৰ বিৰুদ্ধে 44 ৰাণত জয়ী দিল্লী
