যোৰহাট , 21 মে': যোৰহাট নগৰৰ বহু কেইটা গুৰুত্বপূৰ্ণ পথৰ ভিতৰত জে.বি ৰোডটো অন্যতম ৷ কিন্তু এই পথটোৰ জৰাজীৰ্ণ অৱস্থাৰ বাবে নগৰবাসীয়ে জীয়াতু ভুগিবলগীয়া হৈছে ৷
যোৰহাট নগৰৰ এ টি ৰোডৰ পৰা ৰাষ্ট্ৰীয় উপপথলৈকে পথছোৱাত পুখুৰী সদৃশ গাঁত সৃষ্টি হৈছে ৷ যাৰ ফলত এই পথটোত সঘনাই দূৰ্ঘটনাৰ সংঘটিত হোৱাৰ অভিযোগ দিয়ে অঞ্চলবাসীয়ে ৷ উল্লেখ্য যে 'নগৰ আন্ত:গাঁঠনি উন্নয়ন পুঁজি'ৰ জৰিয়তে নিৰ্মাণ কৰিব লগীয়া জে.বি ৰোডটো, 2018-19 বৰ্ষতে নিৰ্মাণৰ সময় নিৰ্ধাৰণ কৰা হৈছিল ৷ প্ৰায় 6 কোটি 56 লাখ টকাৰে নিৰ্মাণ কৰিবলগীয়া পথটোৰ, বৰ্তমান সময়ত মাত্ৰ 20 শতাংশ হে কামৰ অগ্ৰগতি হৈছে ৷ তথ্য অনুসৰি পথটো নিৰ্মাণ কৰিবলৈ আৰু আন এটা বছৰ লাগিব ৷ যিহেতু পথটোৰ দুয়ো ফালে পকা-নলা নিৰ্মাণ হোৱাৰ পাচতহে পথ নিৰ্মাণৰ কামৰ অগ্ৰগতি হ'ব ৷ আনফালে বাৰিষাৰ সময়ত এনেধৰনৰ গুৰুত্বপূৰ্ণ পথ সমূহৰ জৰাজীৰ্ণ ৰূপে জনসাধাৰণক ব্যাপক সমস্যাত পেলাব সেইয়া নিশ্চিত ৷
