যোৰহাট, ১১ নৱেম্বৰ: সততে দৰিদ্ৰ তথা আৰ্তজনক সহায় কৰাৰ বাবে বেচৰকাৰী সংস্থাবোৰে উল্লেখ্যনীয় ভূমিকা পালন কৰে । বেচৰকাৰী সংস্থাবোৰে বিভিন্ন সা-সুবিধাও আগবঢ়ায়, যিবোৰ এই লোকসকলক যথেষ্ট উপকৃত কৰে । কিন্তু এতিয়া সহায় কৰাৰ নামত একাংশ বেচৰকাৰী সংস্থাই প্ৰৱঞ্চনাৰ জালত পেলাইছে সহজ-সৰল লোকক । যোৰহাটৰ মুৰমুৰীয়া চাহ বাগিচাত সংঘটিত হৈছে এনে এক ঘটনা ।
প্ৰায় ৬ মাহ মান আগতে সহায় কৰাৰ অচিলাৰে মুৰমুৰীয়া চাহ বাগিছাৰ ২৮ নং লাইনৰ দৰিদ্ৰ লোকসকলক সাক্ষাৎ কৰিছিল নয়ন বৰদলৈ নামৰ এজন ব্যক্তিয়ে । নিজকে ভোগদৈ ইণ্টাৰনেশ্যনেল প্ৰাইভেট লিমিটেড নামৰ এটা বেচৰকাৰী সংস্থাৰ সঞ্চালক বুলি পৰিচয় দি নয়ন বৰদলৈয়ে বাগিচাখনৰ সহজ-সৰল লোকসকলক আধাৰ কাৰ্ড, পেন কাৰ্ড আদি প্ৰস্তুত কৰাত সহায় কৰিছিল । লগতে নয়ন বৰদলৈয়ে বেচৰকাৰী সংস্থাটোৰ নামত গাঁওবাসীক কেইবাখনো আঁচনিৰ সুবিধা প্ৰদানৰ প্ৰলোভন দিছিল । নিবনুৱাসকলক প্ৰতি মাহে ৩০০০ টকাকৈ দিয়া, যুৱতীসকলক নাৰ্চিং পাঠ্যক্ৰম কৰোৱাকে ধৰি বহু প্ৰলোভন দিছিল নয়ন বৰদলৈয়ে ।
এই সুবিধাসমূহ লাভ কৰিবলৈ বেংক একাউন্টৰ প্ৰয়োজন বুলি কৈ ১৩১ জন লোকৰ নামত বেংক একাউন্ট খুলি দিয়ে । কিন্তু বেংকৰ কৰ্মচাৰী আহি তেওঁলোকৰ ঘৰত উপস্থিত হোৱাৰ পিছতহে চকু কপালত উঠিল এই ১৩১ জন লোকৰ ।
কিয়নো, নয়ন বৰদলৈয়ে অতি কৌশলৰে বেংক একাউন্ট খুলি এই লোকসকলৰ নামত হাজাৰ হাজাৰ টকাৰ ঋণ লোৱাৰ লগতে ই এম আই পৰিশোধ কৰিব বুলি কৈ সা-সামগ্রীও লৈছে । কাৰোবাৰ নামত যদি এয়াৰ কণ্ডিছনাৰ লৈছে, আন কাৰোবাৰ নামত ল'লে ৰেফ্ৰিজাৰেটৰ । এতিয়া এই ঋণৰ বোজা ল'বলগীয়া হোৱাত হাহাকাৰ পৰিস্থিতি সৃষ্টি হৈছে এই দৰিদ্ৰ লোকসকলৰ মাজত ।
আনহাতে, কেৱল মুৰমুৰীয়া চাহ বাগিচাতে নহয়, মৰিয়নী আৰু টীয়কৰ দুখন চাহ বাগিচাতো অনুৰূপ ধৰণে প্ৰৱঞ্চনাৰ কৰাৰ অভিযোগ উত্থাপন হৈছে নয়ন বৰদলৈৰ বিৰুদ্ধে । চিনামৰা থানাৰ লগতে লাহদৈগড় আৰু দেবেৰাপাৰা আৰক্ষী চকীতো গোচৰ ৰুজু কৰা হৈছে নয়ন বৰদলৈৰ বিৰুদ্ধে । এই প্ৰৱঞ্চক নয়ন বৰদলৈক গ্ৰেপ্তাৰ কৰাৰ লগতে দৰিদ্ৰ লোকসকলক ঋণৰ বোজাৰ পৰা মুক্ত কৰিবলৈ প্ৰশাসনক আহ্বান জনাইছে চাহ জনজাতি ছাত্ৰ সন্থাই ।
লগতে পঢ়ক:নতুন পাঁচগৰাকী বিধায়কক শপত বাক্য পাঠ কৰোৱালে অধ্যক্ষ বিশ্বজিৎ দৈমাৰীয়ে
