মৰিয়নী , 27 জুলাইঃ চৰকাৰী পানীৰ পাইপ অবৈধ ভাবে হস্তগত কৰি নিজ গৃহ নিৰ্মাণত ব্যৱহাৰ কৰি আৰক্ষীৰ হাতত গ্ৰেপ্তাৰ হ’ল মৰিয়নীৰ এজন কংগ্ৰেছী নেতা তথা জনস্বাস্থ্য কাৰিকৰী বিভাগৰ ঠিকাদাৰ ৷ ঘটনাৰ বিৱৰণী মতে , মৰিয়নীৰ নকছাৰীৰ দেৱেৰাপাৰ গাঁৱৰ বাসিন্দা ইমতাজ আলি নামৰ লোক জনৰ বিৰুদ্ধে নিজ গৃহ নিৰ্মাণত জনস্বাস্থ্য কাৰিকৰী বিভাগৰ পাইপ চুৰি কৰি ব্যৱহাৰ কৰাৰ অভিযোগ উত্থাপন কৰি দেবেৰাপাৰ আৰক্ষী চকীত এজাহাৰ দাখিল কৰিছিল স্থানীয় যুৱক পাপু জামাল হাজৰিকাই ৷ সেই এজাহাৰৰ ভিত্তিতে বীৰ লাচিত সেনাৰ নকছাৰী শাখাৰ সহযোগত ব্যক্তিজনৰ বাসগৃহতো অভিযান চলাই বহু সংখ্যক চৰকাৰী পাইপ উদ্ধাৰ কৰিবলৈ সক্ষম হয় দেবেৰাপাৰ আৰক্ষী চকীৰ ভাৰপ্ৰাপ্ত আৰক্ষী বিষয়া ৰসেশ্বৰ দত্ত আৰু মৰিয়নী ৰাজহ চক্ৰ বিষয়া বিশ্বজিৎ বৰাই ৷
অভিযোগ অনুসৰি , লোক জনে নৱ নিৰ্মিত গৃহটোৰ খুটা সমূহ নিৰ্মাণত পানীৰ পাইপ সমুহ ব্যৱহাৰ কৰিছিল ৷ পাইপ সমূহ ঢাকি ৰাখিবৰ বাবে নিৰ্মামৰ পাছত চিমেণ্টেৰে প্লাষ্টাৰ কৰাৰ ব্যৱস্থা কৰিছিল ব্যক্তিগৰাকীয়ে ৷ অভিযানৰ পাছতে ব্যক্তিজনৰ বিৰুদ্ধে ভাৰতীয় দণ্ড বিধি আইনৰ ৩৭৯ ধাৰাত ২৩৫\২০ ধাৰাত গোচৰ ৰুজু কৰি ইমতিয়াজ আলিক গ্ৰেপ্তাৰ কৰে আৰক্ষীয়ে ৷
উল্লেখ্য যে , জনস্বাস্থ্য কাৰিকৰী বিভাগে মৰিয়নি গ্ৰেটাৰ চেলেংহাট পানী যোগান আঁচনিত ব্যৱহাৰ কৰিবলৈ বৃহৎসংখক পানীৰ পাইপ মজুত কৰি ৰাখিছিল ৷ বিভাগটোৰ পৰাই পানীৰ পাইপ চুৰি হোৱাৰ পাছতো বিভাগৰ ফালৰ পৰা আৰক্ষীক অৱগত নকৰালৈ লক্ষ্য কৰি এই অবৈধ কাৰ্যত বিভাগটোৰ আন কোনো ব্যক্তিও জড়িত থকাৰ সন্দেহ প্ৰকাশ কৰিছে আৰক্ষীয়ে ৷
