যোৰহাট, 11 আগষ্ট: "ভাৰতৰ প্ৰধানমন্ত্ৰী নৰেন্দ্ৰ মোদীৰ নিৰ্দেশনাক্ৰমে এইবাৰ দেশজুৰি ভাৰতৰ স্বাধীনতা লাভ কৰাৰ 75 বছৰ সম্পূৰ্ণ হোৱাৰ উপলক্ষে বিভিন্ন ধৰণৰ কাৰ্যসূচী হাতত লোৱা হৈছে ৷ তাৰেই অংশানুসৰি ভাৰতৰ বিভিন্ন ঠাইত যিসকল স্বাধীনতা সংগ্ৰামী তথা তেওঁলোকৰ পৰিয়াল জীৱিত অৱস্থাত আছে তেওঁলোকক সম্বৰ্ধনা জনোৱা হৈছে ৷ কোনো ঠাইত যদি সই সময়ৰ স্বহীদৰ প্ৰতিমূৰ্তি আছে তাত আমি মাল্যৰ্পণ কৰিছো (Har Ghar Tiranga Abhiyan in Jorhat)৷ তাৰোপৰি চৰকাৰৰ ফালৰ পৰা অহা 13 আগষ্টৰ পৰা ঘৰে ঘৰে জাতীয় পতাকা কাৰ্যসূচী দেশজুৰি পালন কৰা হ’ব ৷ আমি ইতিমধ্যে চৰকাৰীভাৱে পতাকাসমূহ বিতৰণ কৰি আছো ৷ আমি বিচাৰো যে প্ৰত্যেক জাতি, ধৰ্মৰ লোকে এই পতাকা উত্তোলন কৰক ৷ তাৰ যোগেদি আমি বিশ্বক আমাৰ দেশখনৰ ঐক্যতা দেখুৱাই দিব পাৰো ৷ মোক যোৰহাটত দায়িত্ব দিয়া হৈছে ৷ সেইবাবে মই আজি যোৰহাটলৈ আহিছো ৷"
যোৰহাটৰ গান্ধী পাৰ্কত ঘৰে ঘৰে জাতীয় পতাকা অভিযান উদ্বোধন কৰি আজি এইদৰে কয় কেন্দ্ৰীয় মন্ত্ৰী ৰামেশ্বৰ তেলীয়ে (Central Minister Rameswar Teli in Jorhat)৷ লগতে তেওঁ মহাত্মা গান্ধীৰ প্ৰতিমূৰ্তিতো মাল্যৰ্পন কৰি এই মন্তব্য আগবঢ়াই (Minister Rameswar Teli inaugurate Har Ghar Tiranga Abhiyan in Jorhat)৷
ইয়াৰোপৰি কেন্দ্ৰীয় মন্ত্ৰীগৰাকীয়ে যোৰহাট জিলাৰ মুক্তিযোদ্ধা খৰ্গেশ্বৰ গগৈক সন্মান জনোৱাৰ উপৰিও স্বাধীনতা সংগ্ৰামী সকলৰ পৰিয়ালবৰ্গ পুষ্পলতা গগৈ , ভৱানী দলে , নলিনীবালা দত্ত , অৰুণা দত্ত , প্ৰমোদ চন্দ্ৰ নেওঁগ , ড৹ পৰাণ বৰুৱাৰ লগতে কেইবাগৰাকী লোকক ফুলাম গামোচা পিন্ধাই সম্বৰ্ধনা জনায় ৷
লগতে কেন্দ্ৰীয় মন্ত্ৰীগৰাকীয়ে বুধবাৰে ৰাজ্যৰ মুখ্যমন্ত্ৰীয়ে চাহ শ্ৰমিকসকলৰ মজুৰি বৃদ্ধি কৰাৰ প্ৰসংগত কয়, "চাহ শ্ৰমিকসকলৰ দাবী অনুসৰি তেওঁলোকৰ মজুৰি বৃদ্ধি কৰা হৈছে ৷ চাহ বাগিচাৰ দৰমহা কিমান বৃদ্ধি কৰিলে চাহ বাগিচাবোৰো যাতে ভালকৈ চলিব পাৰে, এই কথা আমি ভালকৈয়ে জানো ৷ সেইকাৰণে আমাৰ মুখ্যমন্ত্ৰী হিমন্ত বিশ্ব শৰ্মায়ো কৈছে যে এনেকুৱা নহওক যাতে দৰমহাটো বৃদ্ধি হ’লেই চাহ বাগিচাৰ মালিকসকলৰ বাগিচা চলাওঁতে অসুবিধা হ’ব পাৰে নেকি ! এই কথাবোৰ চিন্তা কৰি বিভিন্ন ট্ৰেড ইউনিয়নৰ লগত আলোচনা কৰাৰ লগতে আমাৰ লগতো আলোচনা কৰি চাহ শ্ৰমিকসকলৰ মজুৰি বৃদ্ধি কৰাৰ সিদ্ধান্ত গ্ৰহণ কৰিছে ৷"
উল্লেখ্য যে কেন্দ্ৰীয় মন্ত্ৰী ৰামেশ্বৰ তেলীয়ে পশ্চিম যোৰহাটৰ নেইষ্ট(CSIR NEIST) ত ৰাষ্ট্ৰীয় পতাকা উত্তোলন কৰাৰ লগতে নেইষ্টৰ চৌহদত থকা জননায়ক দেৱেশ্বৰ শৰ্মাৰ প্ৰতিমূৰ্তিত শ্ৰদ্ধা নিবেদন কৰে ৷ এই অনুষ্ঠানত মৰিয়নি সমষ্টিৰ বিধায়ক ৰূপজ্যোতি কুৰ্মী , জিলা সভাপতি হেমন্ত কলিতা , জিলা উপায়ুক্ত অশোক কুমাৰ বৰ্মন , অতিৰিক্ত জিলা উপায়ুক্ত দামোদৰ বৰ্মন, সহকাৰী আয়ুক্ত পৰিণীতা চক্ৰৱৰ্তী , ONGC ৰ মেচিন মেনেজাৰৰ লগতে বহু কেইজন গন্যমান্য ব্যক্তি উপস্থিত থাকে ।
লগতে পঢ়ক: Har Ghar Tiranga Abhiyan: বিশিষ্ট ব্যক্তি, ৰাজনীতিক, সাংবাদিকক জাতীয় পতাকা উপহাৰ মুখ্যমন্ত্ৰীৰ
