গোলাঘাট, ১০ আগষ্ট: আধুনিকতাৰ পৰশ নপৰা এখন গাঁও । লগতে উন্নয়নৰ মুখ দেখিবলৈকো সৌভাগ্যবান নহ'ল গাঁওবাসী সকল । গাঁওখনৰ নাম হৈছে ফলঙনী গাঁও । যিখন গাঁৱত আজি পৰ্যন্ত পৰা নাই বিদ্যুতৰ পোহৰ, নাই এটা সুচল পথ অথবা বিশুদ্ধ খোৱাপানীৰ ব্যবস্থা ।
গাঁওখন হৈছে গোলাঘাট সদৰৰ পৰা মাত্ৰ ১৮ কিলোমিটাৰ নিলগৰ ৮০ টা পৰিয়ালে বসবাস কৰা মৰঙি মৌজাৰ ফলঙনী গাঁও ৷ চৰকাৰক আবেদন নিবেদন কৰি দশকৰ পিছত দশক কোনো সুফল নাপালে গাঁওবাসীয়ে ।
দুৰ্ভগীয়া গাওঁবাসীক চুব পৰা নাই কোনো চৰকাৰী উন্নয়নমূলক আঁচনিয়েও । চৰকাৰৰ দৃষ্টিত আজি পৰ্যন্ত ধৰা নপৰা গাঁওবাসীয়ে নিজৰ ক্ষোভ উজাৰি কৈ গ'ল তেওঁলোকৰ দূৰ্দশাৰ কথা ।
নিৰ্বাচনৰ সময়ত বিভিন্ন ৰাজনৈতিক দলৰ প্ৰাৰ্থীয়ে দি যায় অলেখ প্ৰতিশ্ৰুতি । গাদী দখলৰ পাছতে এই প্ৰতিশ্ৰুতি বোৰ হয়গৈ ফুটুকাৰ ফেন । সেয়েহে এইবাৰ গাঁওবাসী হৈছে অধিক সতৰ্ক । আগন্তুক বিধান সভাৰ নিৰ্বাচনত ভোট বৰ্জন কৰিব গাওঁবাসীয়ে । দেশে স্বাধীনতাৰ ৭৩ বছৰ গৰকাৰ পিছতো একাংশ গ্ৰাম্যাঞ্চলৰ এনে অৱস্থাই সেই গাঁও সমূহত বসবাস কৰা গাঁওবাসীক ভাবিবলৈ বাধ্য কৰায়, সঁচাকৈয়ে আমি স্বাধীন দেশৰ স্বাধীন নাগৰিক নে !
