গোলাঘাট, 26 জুলাই : কাৰ্গিল যুদ্ধৰ গৌৰৱ উদযাপনেৰে 26 জুলাই, দেওবাৰে সমগ্ৰ দেশে উদযাপন কৰে বিজয় দিৱস ৷ ভাৰতীয় স্থলসেনাই কাৰ্গিলৰ সুউচ্চ পাহাৰত হাড় কঁপোৱা শীতত চিৰবৈৰী পাকিস্তানৰ বিৰুদ্ধে কৰিছিল এই যুদ্ধ ৷ পাকিস্তানৰ সেনা প্ৰধান জেন. পাৰভেজ মুশ্বাৰফৰ ভাৰত আক্ৰমণৰ বাসনাই সৃষ্টি কৰিছিল এই যুদ্ধৰ ৷ চোৰৰ দৰেই ভাৰতীয় সেনাই এৰি অহা বাংকাৰত আহি খোপনি পুতিছিল পাকিস্তানী সেনাই ৷ পাকিস্তানী সেনাই এই যুদ্ধক কোনোদিনে মানি লোৱা নাছিল যদিও ভাৰতীয় সেনাই প্ৰমাণসহকাৰে আন্তঃৰাষ্ট্ৰীয় পৰ্যায়ত পাকিস্তানৰ মিথ্যাচাৰ উদঙাই দিছিল ৷
সেই যুদ্ধতে প্ৰাণ হেৰুৱাইছিল লাচিতৰ তেজেৰে শক্তিশালী এজন অসমীয়া সেনানীয়ে ৷ দেশৰ অখণ্ডতা ৰক্ষা কৰিবলৈ গৈ কাৰ্গিলৰ উচ্চ শিখৰত প্ৰাণ আহুতি দিছিল 17 গাড়ৱাল ৰেজিমেন্টৰ কেপ্টেইন জিন্টু গগৈয়ে । বৰ্তমান ঘৰত থকা একমাত্ৰ পিতৃ মাতৃৰ বুজ ল'বলৈ কেপ্টেইনৰ বাসগৃহত উপস্থিত হৈছিল আমাৰ সাংবাদিক দিগন্ত চাহু । পুত্ৰৰ স্মৃতি আজিও সজীৱ কৰি ৰাখিছে পিতৃ মাতৃয়ে । জিন্টু গগৈ কেৱল এজন যুঁজাৰু আছিল তেনে নহয়, জিন্টু আছিল এগৰাকী চিত্ৰ শিল্পী আৰু ভাল ফুটবল খেলুৱৈয়ো ।
1999 চনৰ 2 জুন তাৰিখটো আছিল শ্বহীদ কেপ্টেইন জিন্টু গগৈৰ পৰিয়ালৰ এটা বৰ আনন্দৰ দিন । জিন্টু গগৈৰ পিতৃ বায়ুসেনা বিষয়া ঠগিৰাম গগৈ, মাতৃ দুলুপ্ৰভা গগৈ আৰু দুই ভগ্নী বিশেষ ৰেলযোগে উপস্থিত হৈছিল দিল্লীত । জিন্টু গগৈয়ে নিজেই পছন্দ কৰা ছোৱালীৰ আঙুঠি পিন্ধাবলৈ । অঞ্জনা পৰাশৰ নামৰ এগৰাকী কন্যাৰ লগত আনুষ্ঠানিকভাৱে আঙুঠি পিন্ধোৱা হৈছিল জিন্টুৰ । সেই দিনটোৱেই আছিল পৰিয়ালৰ সকলো উপস্থিত হোৱা এটা শেষ মূহুৰ্ত । কোনেও জনা নাছিল মাত্ৰ 28টা দিনৰ পিছতেই চিৰদিনৰ বাবে পৰিয়ালৰ পৰা আঁতৰি যাব পৰিয়ালৰ একমাত্ৰ সন্তান জিন্টু । আঙুঠি পিন্ধাই পৰিয়ালৰ লগতে নিজৰ হ'বলগীয়া পত্নীৰ পৰা বিদায় লৈছিল জিন্টু গগৈয়ে । কিয়নো জিন্টু লৈ নিৰ্দেশ আহিছিল শীঘ্ৰে যুদ্ধৰ বাবে যাব লাগে কাৰ্গিললৈ । চিৰবৈৰী পাকিস্তানৰ লগত যুদ্ধত নামি পৰিল জিন্টু ।
অৱশেষত বেয়া খবৰটো আহিল 30 জুন তাৰিখে । গোলাঘাটৰ উপায়ুক্তৰ বিশেষ এটা দলে মৃত্যুৰ বতৰা লৈ উপস্থিত হয় জিন্টু গগৈৰ খুমটাইস্থিত বাসগৃহত । জিন্টুৰ কইনা অহা ঘৰখনলৈ ঘূৰি আহিল জিন্টুৰ নশ্বৰ দেহ । কফিনত আৱদ্ধ জিন্টুৰ নিথৰ দেহে সকলোকে কৰিলে অশ্ৰুসজল ।
কাৰ্গিল যুদ্ধৰ বৰ্তমানে পাৰ হ'ল 21টা বছৰ । 21টা বছৰে পিতৃ মাতৃয়ে ধৰি ৰাখিছে পুত্ৰৰ স্মৃতি । পুত্ৰৰ বস্ত্ৰ, সামৰিক পোছাক, চিত্ৰ সযতনে ৰাখিছে বীৰৰ পিতৃ মাতৃয়ে । কেপ্টেইন জিন্টু গগৈৰ সমাধিত পুৱা গধূলি বন্তি প্ৰজ্জ্বলন কৰে পৰিয়ালৰ লোকে ।
উল্লেখযোগ্য যে, পুত্ৰৰ পৰাক্ৰম অটুট ৰাখিবলৈ নিজৰ গাঁঠিৰ ধনেৰে 26 জুলাইত কাৰ্গিল বিজয় দিৱস, 30 জুনত জিন্টু গগৈৰ মৃত্যু তিথি উদযাপন কৰি আহিছে পিতৃ মাতৃয়ে । বিশেষকৈ 26 জুলাইত কাৰ্গিল বিজয় দিৱস পৰিয়ালৰ লগতে স্থানীয় জাচিংফা লেখিকা সমাৰোহ সমিতিয়ে নিজেই উদযাপন কৰি আহিছে । চৰকাৰ তথা প্ৰশাসনে এই ক্ষেত্ৰত গুৰুত্ব দিব লাগিছিল যদিও কোনো ধৰণৰ গুৰুত্ব প্ৰদান কৰা দেখা পোৱা হোৱা নাই । 2019 বৰ্ষত তেতিয়াৰ গোলাঘাটৰ উপায়ুক্ত ধীৰেণ হাজৰিকাই প্ৰশাসনৰ তৰফৰ পৰা 2020 বৰ্ষত জিন্টু গগৈ সমাধি ক্ষেত্ৰত কাৰ্গিল বিজয় দিৱস উদযাপন কৰা হব বুলি ঘোষণা কৰিছিল । কিন্তু এইক্ষেত্ৰত বৰ্তমান উপায়ুক্ত বিভাষ চন্দ্ৰ মোদীয়ে কেনেধৰণৰ ব্যৱস্থা গ্ৰহণ কৰে দোমোজাত পৰিছে পৰিয়ালৰ লগতে জাচিংফা লেখিকা সমাৰোহ সমিতিয়ে । বীৰ শ্বহীদ কেপ্টেইন জিন্টু গগৈক লৈ গৌৰৱান্বিত ৰাজ্যৰ লগতে গোলাঘাট জিলা আৰু খুমটাইবাসী ।
