খুমটাই,7 জানুৱাৰীঃ ৰাজ্যৰ বিভিন্ন প্ৰান্তত নাগৰিকত্ব সংশোধনী আইনৰ বিৰুদ্ধে প্ৰতিবাদ হৈ থকাৰ সময়তে টাই আহোম উন্নয়ন পৰিষদৰ উদ্যোগত খুমটাইত অনুষ্ঠিত হয় সাংস্কৃতিক কৰ্মশালা আৰু সাংস্কৃতিক অনুষ্ঠান ৷ খুমটাইত কেপ্টেইন জিণ্টু গগৈ সোঁৱৰণি সভাগৃহত টাই আহোম উন্নয়ন পৰিষদৰ উদ্যোগত আহোম সম্প্ৰদায়ৰ জিলা খনৰ বিভিন্ন প্ৰান্তৰ বহু সংখ্যক যুৱতী আৰু মহিলাক একত্ৰিত কৰি অনুষ্ঠিত হয় সাংস্কৃতিক কৰ্মশালাৰ অনুষ্ঠান ৷ এই সাংস্কৃতিক কৰ্মশালাৰ অনুষ্ঠানত মুখ্য অতিথি হিচাপে উপস্থিত থাকে বিশিষ্ট কণ্ঠশিল্পী জীনা ৰাজকুমাৰী ৷ বিশিষ্ট কণ্ঠশিল্পীগৰাকীয়ে এই অনুষ্ঠানত অংশগ্ৰহণ কৰি অনুষ্ঠানৰ মাজতে ৰাজ্যৰ বিভিন্ন শিল্পীৰ দৰে নাগৰিকত্ব সংশোধনী আইনৰ বিৰোধিতা কৰাৰ কথা উল্লেখ কৰে ৷
উল্লেখ্য যে,খুমটাইত টাই আহোম উন্নয়ন পৰিষদৰ উদ্যোগত জনগোষ্ঠীটোৰ কৃষ্টি,সংস্কৃতি নতুন প্ৰজন্মৰ মাজত চিনাকি কৰি দিয়াৰ মানসেৰে এই অনুষ্ঠানৰ আয়োজন কৰাৰ কথা উল্লেখ কৰে উদ্যোক্তাই ৷ তিনিদিনীয়া কাৰ্যসূচীৰে অনুষ্ঠিত হোৱা সাংস্কৃতিক কাৰ্যসূচীত বিভিন্ন সাংস্কৃতিক অনুষ্ঠান প্ৰৰ্দশন কৰাৰ লগতে অংশগ্ৰহণ কৰে কেইবাগৰাকী আমন্ত্ৰিত ব্যক্তিয়ে।
লগতে পঢ়কঃবিপাশাৰ জন্মদিনঃ চিকিৎসক হোৱাৰ সপোন দেখা ছোৱালীজনী কেনেকৈ আহিল কেমেৰাৰ সমুখলৈ
