সৰুপথাৰ, 27 আগষ্টঃ ধনশিৰি মহকুমাৰ বাট পথৰ দুৰৱস্থাই জীয়াতু ভোগাইছে ধনশিৰি মহকুমাবাসীক । বৰপথাৰ উৰিয়ামঘাট ৰেংমা সংযোগী পথ, শিলনীজানৰ পৰা বৰপথাৰ হৈ সৰুপথাৰ সংযোগী পথ, টেঙানী ফৰেষ্ট আলি আৰু ভূজৰ আলি পথ, ঘনশ্যাম বৰুৱা পথ, বৰপথাৰ জামুগুৰি সংযোগী NCC পথৰ মেৰামতি আৰু পুনৰ নিৰ্মাণৰ দাবীত ছাত্ৰ সন্থাই এঘন্টীয়া পথ অৱৰোধ কাৰ্যসূচী গ্ৰহণ কৰে৷ অসম চৰকাৰ হায় হায়, গড়কাপ্তানি বিভাগ গ' বেক, হিমন্ত বিশ্ব শৰ্মা হায় হায় আদি ধ্বনিৰে মুখৰিত হৈ পৰে অঞ্চলটোৰ আকাশ বতাহ | অনাগত দিনত পথসমূহ নিৰ্মাণ নকৰিলে ইয়াতকৈ জংগী আন্দোলন গঢ়ি তোলাৰ হুংকাৰ প্ৰতিবাদকাৰীৰ ।
উল্লেখ্য যে, এবছৰ পূৰ্বে শিলনীজানৰ পৰা সৰুপথাৰ সংযোগী ১৯ কি মি দূৰত্বৰ পথটো গড়কাপ্তানি বিভাগে CCL নামৰ বহিৰাগত পথ নিৰ্মাণকাৰী সংস্থাক ২১ কোটি টকাৰ নিবিদা প্ৰদান কৰিছিল৷ কিন্তু এবছৰ সম্পূৰ্ণ নহওতেই পথটো জহি খহি যোৱাৰ উপক্ৰম হোৱাত শীঘ্ৰেই পথটো পুনৰ নিৰ্মাণৰ দাবী জনাইছে ছাত্ৰ সংগঠনটোৱে ।
