সৰুপথাৰ/মাজুলী, 17 ডিচেম্বৰ : আঘোণৰ কুঁৱলীয়ে বাট ভেটি কৰিছে আমনি, একোকে নমনি ৷ কুঁৱলী সনা আঘোণৰ পাচতে পুহ আৰু পুহৰ সংক্ৰান্তিতেই অসমীয়াই পালন কৰে ভোগৰ উৎসৱ ভোগালী বিহু ৷ আঘোণ বাগৰি পুহ সোমাবৰ হ’ল, ব্যস্ততাৰ সীমা নাই চহা কৃষকৰ ৷
কিন্তু ব্যস্ততাৰ মাজতেই সোণোৱালী পথাৰৰ নৰা আৰু বাৰীৰ ঢাপৰ বাঁহ কাটি বৰ্নিল ভেলাঘৰ সাজিবলৈ প্ৰস্তুতি চলাইছে ৰাজ্যৰ দপথাৰবাসী ৰাইজে ৷ বিগত প্ৰায় দুবছৰে ৰাইজে বহুল ভাৱে আয়োজন কৰিব পৰা নাই ভোগালী বিহু । সেয়ে ঐক্য সম্প্ৰীতিৰ এনাজৰীৰে জাতি, বৰ্ণ নিৰ্বিশেষে সকলো ৰাইজৰ সহযোগত গোলাঘাট জিলাৰ বৰপথাৰ মৌজাৰ অন্তৰ্গত দপথাৰ বাসী ৰাইজ এইবাৰ সাজু হৈছে ভোগালী বিহু উদযাপন(Bhogali Bihu Celebration)ৰ বাবে ।
এইবাৰ যদিও খৰাঙৰ বাবে গাঁওবাসীৰ পথাৰ সমূহত নহ'ল ধান, তথাপি অঞ্চলটোৰ সকলো পুৰুষ মহিলাই হাতে হাতে কাঁচি, দালৈ ওলাই আহিল মেজিৰ বাবে খৰি আৰু ভেলাঘৰ প্ৰস্তুতৰ বাবে নৰা কাটিবলৈ । পথাৰত খৰাঙৰ বাবে ধান নোহোৱাৰ বাবে অভাৱ হৈছে নৰাৰ ৷ তথাপি অঞ্চলটোৰ বিভিন্ন জাতি-জনজাতি বোৱাৰী, গাভৰু সকলে সম্প্ৰীতিৰ এনাজৰীৰে বিহু গীতত নৃত্য কৰি কৰি নৰা কটা দেখা গৈছে ।
কেৱল দ-পথাৰেই নহয়, ভোগৰ উৎসৱ ভোগালীক আদৰিৱলৈ মাজুলীতো চলিছে ব্যাপক প্ৰস্তুতি ৷ ভেলাঘৰ সাজিবলৈ পথাৰৰ নৰা কাটিবলৈ ওলাই আহিল নামনি মাজুলী চিলাকলা গাঁৱৰ শতাধিক যুৱক-যুৱতী, পুৰুষ মহিলা । বিগত বৰ্ষ সমূহৰ দৰে এই বছৰো দৃষ্টিনন্দন আৰু আটকধুনীয়া ভেলা ঘৰ নিৰ্মাণ কৰি ৰাজ্যবাসীৰ দৃষ্টি আৰ্কষণ কৰিবলৈ পুনৰবাৰ সাজু হৈছে মাজুলী চিলাকলা গাঁৱৰ যুৱক-যুৱতীৰ লগতে পুৰুষ-মহিলা সকল । যাৰ বাবে মাজুলীৰ চিলাকলা গাঁৱৰ শতাধিক যুৱক-যুৱতীক দেখা গ’ল পথাৰত নৰা কটা ৷
এয়াই চহা জীৱনৰ মাদকতা ৷ এয়াই পৰিচয় অসমীয়া জাতিৰ ৷ কাল কৰ’ণাৰ ত্ৰাসৰ মাজতো অসমীয়াৰ পৰিচয় বজাই ৰাখিবলৈ প্ৰয়াস চহা অসমীয়াৰ ৷
লগতে পঢ়ক : পুৱাৰ আনন্দ বিলাই ফুৰা এগৰাকী বিশেষ যুৱতী
