আমগুৰি, 3 অক্টোবৰ : আমগুৰি আৰক্ষীয়ে অবৈধ সুৰাৰ বিৰুদ্ধে অভিযান অব্যাহত ৰাখিছে ৷ আমগুৰিৰ হালোৱাটিং আৰক্ষীয়ে শনিবাৰে অভিযান চলাই অবৈধভাৱে মজুত কৰি ৰখা বৃহৎ পৰিমাণৰ বিলাতী সুৰা জব্দ কৰে ৷ আমগুৰিৰ অসম-নাগালেণ্ড সীমান্তৱৰ্তী হালোৱাটিং বজাৰৰ এখন হোটেলৰ পৰা আৰক্ষীয়ে জব্দ কৰে বিলাতী সুৰাখিনি ।
দিগন্ত শইকীয়া নামৰ এজন লোকৰ হোটেলৰ পৰা আৰক্ষীয়ে অবৈধভাৱে মজুত কৰি ৰখা বিভিন্ন ব্ৰেণ্ডৰ সুৰাৰ বটলসমূহ জব্দ কৰে ৷ হোটেলখনৰ গৰাকী দিগন্ত শইকীয়াকো আৰক্ষীয়ে আটক কৰিছে ৷ হালোৱাটিং আৰক্ষীয়ে ইতিমধ্যে জব্দ কৰা সুৰাৰ বটলখিনি আমগুৰি আবকাৰী বিভাগক হস্তান্তৰ কৰিছে ।
আৰক্ষীয়ে জব্দ কৰা সুৰাখিনিৰ মূল্য প্ৰায় 30 হাজাৰ টকা হ’ব বুলি জানিব পৰা হৈছে ৷ উল্লেখ্য যে, অসম নাগালেণ্ড সীমান্তৱৰ্তী এই অঞ্চলটোত বিভিন্ন অবৈধ সামগ্ৰীৰ সৰবৰাহ অব্যাহত থকাৰ অভিযোগ বিভিন্ন সময়ত উত্থাপিত হৈ আহিছে । এনে অভিযোগৰ ভিত্তিতেই হালোৱাটিং আৰক্ষীয়ে অভিযান চলাই এই সাফল্য লাভ কৰে ৷
লগতে পঢ়ক : একেলগে ৮০০ জন চোৰাং চিকাৰীৰ অস্ত্ৰ সম্বৰণ চিৰাঙত
