সৰুপথাৰ , 24 জুলাই: সমগ্ৰ বিশ্বত বিজ্ঞানে জয়যাত্ৰা অব্যাহত ৰখাৰ সময়তে ধনশিৰি মহকুমাৰ সীমান্তত এতিয়া এটা অঞ্চল অন্ধ বিশ্বাসৰ কৱলত পৰাত তীব্ৰ চাঞ্চল্য সৃষ্টি হৈছে | ঘটনাটো চুঙাজান এম.ভি চাৰি আলিৰ গোপাল বৰাৰ ঘৰত ৷ বহু দিনৰ পৰা তেওঁ ঘৰত ভূতে হেনো দলিয়াই, ফৰমুটিয়াই পৰিয়ালটোক হাৰাশাস্তি কৰি আহিছে | যাৰ ফলত পৰিয়ালটোৱে ভূত খেদিবৰ বাবে বেজৰ সহায় লয় ৷
ইয়াৰপাচতে বেজৰ দলটোয়ে ঘোষণা কৰে যে তেওঁলোকে ভূতক ধৰি ৰাইজৰ সন্মূখত থিয় কৰাব৷ আৰু সেই মতে বেজে পৰিয়ালৰ সকলোকে চোতালত শুৱলৈ কৈ মন্ত-পাঠ কৰি পূজা অৰ্চনা কৰে ৷ তেনে সময়তে একাংশ গাঁওবাসীয়ে বেজৰ প্ৰবঞ্চনাৰ নাটক বুজিব পাৰি আৰক্ষীক খবৰ দিয়ে ৷ একাংশ লোকৰ অভিযোগ অনুসৰি তেওঁলোকে বেজ তথা পৰিয়ালটোৰ বিৰুদ্ধে মাত মাতিব যোৱাত একাংশ অন্ধবিশ্বাসী লোকে তেওঁলোকক প্ৰহাৰ কৰিবলৈও উদ্যত হৈছিল ৷ অৱশ্যে পৰৱৰ্তী সময়ত আৰক্ষী ঘটনাস্থলীত উপস্থিত হৈ অন্ধবিশ্বাসী লোক সকলক ছত্ৰভংগ দিয়ে ৷
