গোলাঘাট, ১২ এপ্ৰিল: জীৱনৰ নিৰাপত্তাক লৈ শংকিত হৈ পৰিছে গোলাঘাটৰ পুলিবৰ নৰাগাঁৱৰ ৰাইজ । নাহৰফুটুকীৰ মুক্ত বিচৰণে চকুৰ টোপনি হৰিছে অঞ্চলবাসীৰ । নিশাতো দূৰৰে কথা দিনতো ঘৰৰ পৰা ওলাবলৈ ভয় কৰে পুলিবৰ নৰাগাঁৱৰ ৰাইজে । বিগত কেইবছৰমান ধৰি খাদ্যৰ সন্ধানত অঞ্চলটোত ত্ৰাসৰ সৃষ্টি কৰি আহিছে নাহৰফুটুকীয়ে ।
ক্ৰমান্বয়ে টাইগাৰ জ'নলৈ পৰিৱৰ্তিত অঞ্চলটোত এইবাৰ বাঘৰ মুক্ত বিচৰণৰ দৃশ্য বন্দী হ'ল মোবাইলৰ কেমেৰাত । উল্লেখ্য যে, বিগত দুটা বছৰৰ ভিতৰত উক্ত অঞ্চলটোৰ পৰা বৰ্তমানলৈকে পিঞ্জৰাবদ্ধ হৈছে ৯টা বাঘ । অঞ্চলটোত বৰ্তমানেও বহু বাঘ থকাৰ কথা সদৰি কৰিছে স্থানীয় লোকে ।
নৰাগাঁও অঞ্চলত দীৰ্ঘদিন ধৰি নাহৰফুটুকীয়ে গৰু, ছাগলী নিধন কৰি আহিছে । ফলত আতংকময় পৰিস্থিতিৰ সৃষ্টি হৈছে । পথাৰ, মানুহৰ ঘৰৰ পিচফালৰ বাৰীত প্ৰৱেশ কৰি নাহৰফুটুকীয়ে ত্ৰাসৰ সৃষ্টি কৰিছে । এনেদৰে বাৰে বাৰে বাঘে অঞ্চলটোত বিচৰণ কৰাক লৈ এতিয়া শংকিত হৈ পৰিছে অঞ্চলবাসীক ।
