গুৱাহাটী: অসম লোকসেৱা আয়োগৰ নতুন অধ্যক্ষ হিচাপে নিযুক্তি দিয়া হৈছে প্রাক্তন আই পি এছ বিষয়া দেৱৰাজ উপাধ্যায়ক । ৰাজ্য চৰকাৰে অসম লোকসেৱা আয়োগৰ নতুন অধ্যক্ষ হিচাপে দেৱৰাজ উপাধ্যায়ক নিযুক্তি দিছে। মঙলবাৰে ৰাজ্য চৰকাৰৰ কৰ্মচাৰী বিভাগে এক নির্দেশনাযোগে দেৱৰাজ উপাধ্যায়ক অসম লোকসেৱা আয়োগ (এ পি এছ চি)ৰ অধ্যক্ষ হিচাপে আনুষ্ঠানিকভাৱে নিযুক্তি দিয়ে ।
উল্লেখ্য যে অসম লোকসেৱা আয়োগৰ পূৰ্বৰ অধ্যক্ষ ভাৰত ভূষণ দেৱচৌধুৰীয়ে ২ জানুৱাৰীত অৱসৰ গ্ৰহণ কৰাৰ পাছতেই অধ্যক্ষ পদটো খালী হৈছিল । যাৰ পৰিপ্ৰেক্ষিতত আয়োগৰ জ্যেষ্ঠ সদস্য প্রাক্তন আৰক্ষী বিষয়া দেৱৰাজ উপাধ্যায়ক নতুন অধ্যক্ষ হিচাপে নিযুক্তি দিয়া হয় । ৰাজ্য চৰকাৰে অধ্যক্ষৰ লগতে দুগৰাকী জ্যেষ্ঠ আমোলাক অসম লোকসেৱা আয়োগৰ নতুন সদস্য পদত নিযুক্তি দিয়ে ।
মুখ্য সচিবৰ কাৰ্যালয়ৰ সমন্বয়ক সচিব পদত কৰ্মৰত আই এ এছ বিষয়া ভাস্কৰ ফুকনক অসম লোকসেৱা আয়োগৰ সদস্য হিচাপে নিযুক্তি দিয়া হৈছে । সেইদৰে মুখ্যমন্ত্ৰীৰ সচিবালয়ৰ সচিব পদত কৰ্মৰত এ চি এছ বিষয়া মৃগেশ নাৰায়ণ বৰুৱাকো আয়োগৰ সদস্য পদত নিযুক্তি দিয়া হৈছে । চাকৰিৰ জীৱনৰ পৰা অৱসৰ ল'বলৈ কেইটামান মাহ বাকী থকা অৱস্থাত বিষয়াদ্বয়ক এ পি এছ চিৰ সদস্য পদত নিযুক্তি দিয়া হৈছে ।
উল্লেখ্য যে অসম লোকসেৱা আয়োগৰ অধ্যক্ষকে ধৰি মুঠ সদস্যৰ সংখ্যা হৈছে সাতগৰাকী । বর্তমান সদস্য হিচাপে কৰ্মৰত হৈ আছে এ চি এছ বিষয়া নাজৰিণ আহমেদ আৰু ভাৰতীয় সেনাৰ প্রাক্তন মেজৰ জেনেৰেল ভাস্কৰ কলিতা । বর্তমান নতুনকৈ দুজন সদস্য নিযুক্তি দিয়াত আয়োগৰ সদস্যৰ সংখ্যা চাৰিগৰাকীলৈ বৃদ্ধি পালে যদিও বর্তমানেও দুটা সদস্যৰ পদ খালী হৈ আছে ।
আনহাতে, বৰ্তমানৰ সদস্য প্রাক্তন এ চি এছ বিষয়া নাজৰিণ আহমেদে ১২ জানুৱাৰীত অৱসৰ গ্ৰহণ কৰিব । ফলত খালী সদস্যৰ পদৰ সংখ্যা তিনিটালৈ বৃদ্ধি পাব । সদস্য পদ খালী হৈ থাকিলে আয়োগৰ পৰীক্ষা পৰিচালনাতো প্রভাৱ পৰাটো নিশ্চিত হৈ পৰিছে । বিগত ডিচেম্বৰতে অসম লোকসেৱা আয়োগৰ সংযুক্ত প্রতিযোগিতামূলক পৰীক্ষাৰ নতুন বিজ্ঞাপন প্ৰকাশ কৰাৰ কথা আছিল যদিও বৰ্তমানেও নতুন পদৰ বিজ্ঞাপন প্ৰকাশ কৰিব পৰা নাই । তদুপৰি ছেপ্টেম্বৰ মাহতে অনুষ্ঠিত কৰা বহুকেইটা পৰীক্ষাৰো এই পর্যন্ত ফলাফল ঘোষণা কৰিবলৈ বাকী আছে ।
