সৰুপথাৰ, ১ জুন : গোলাঘাট জিলাৰ ধনশিৰি মহকুমাৰ শিক্ষাৰ ক্ষেত্ৰৰ অন্যতম অগ্ৰণী শিক্ষানুষ্ঠান হৈছে সৰুপথাৰ মহাবিদ্যালয় । এই মহাবিদ্যালয়ৰে প্ৰাক্তন ছাত্ৰ তথা ২০১৮ বৰ্ষৰ ডিব্ৰুগড় মহাবিদ্যালয়ৰ আন্তঃমহাবিদ্যালয় যুৱ মহোৎসৱৰ শ্ৰেষ্ঠ অভিনেতা অংশুপ্ৰতীম শইকীয়া বৰ্তমান অসুস্থ । মাত্ৰ ২১ বছৰ বয়সতে যকৃতৰ জটিল ৰোগত আক্ৰান্ত হৈছে প্ৰতিভাৱান ছাত্ৰজন ।
গুৱাহাটীৰ নেমকেয়াৰ হাস্পতালত সম্প্ৰতি আই চি ইউত সংকটজনক অৱস্থাত চিকিৎসা চলিছে ছাত্ৰজনৰ । সেয়ে দৰিদ্ৰ পৰিয়ালৰ ছাত্ৰজনক কিছু আৰ্থিক সহায়ৰ বাবে আগবাঢ়ি আহিল সৰুপথাৰ মহাবিদ্যালয়ৰ ছাত্ৰ একতা সভা ।
মহাবিদ্যালয়ৰ সাধাৰণ সম্পাদকৰ পুঁজিৰ পৰা ত্ৰিশ হাজাৰ টকাৰ এক আৰ্থিক সাহাৰ্য প্ৰদান কৰা হয় পৰিয়ালটোক । অংশুপ্ৰতীমৰ পৰিয়ালক সৰুপথাৰ মহাবিদ্যালয়ৰ সাধাৰণ সম্পাদক শিৱাশিষ শৰ্মাই উক্ত ধনৰাশিৰ চেক প্ৰদান কৰে ।
