গোলাঘাট , 07 মে' : গোলাঘাটৰ 39 নং ৰাষ্ট্ৰীয় ঘাইপথটোৱে জ্বলা-কলা খুৱাইছে সাধাৰণ ৰাইজক ৷ এই পথটো মেৰামতি নকৰাৰ ফলত বিধ্বস্ত ৰূপ ধাৰণ কৰিছে ৷ ৰাষ্ট্ৰীয় ঘাইপথ প্ৰাধিকৰণ আৰু চৰকাৰে এই ক্ষেত্ৰত কোনো গুৰুত্ব নিদিয়াৰ অভিযোগ স্থানীয় ৰাইজৰ ৷ গোলাঘাট জিলাৰ নুমলীগড়ৰ পৰা নামবৰ হৈ মণিপুৰৰ ম'ৰে পৰ্যন্ত যাতায়ত কৰা এই পথৰ জৰাজীৰ্ণ ৰূপৰ বাবে এতিয়া সাধাৰণ ৰাইজে জীয়াতু ভুগিবলগীয়া হৈছে ৷
অসমৰ পৰা নাগালেণ্ড, মণিপুৰ হৈ ম্যানমাৰ, থাইলেণ্ড, ইণ্ডোনেছিয়া, মালয়েছিয়া আদি দেশলৈ সংযোগ থকা একমাত্ৰ স্থলপথ হৈছে এই 39 নং ৰাষ্ট্ৰীয় ঘাই থটো ৷ পথটোত দুবাৰকৈ আন্তঃৰাষ্ট্ৰীয় কাৰ ৰেলীও হৈছিল ৷ কিন্তু কাৰ ৰেলীৰ পাচৰে পৰা ভাৰত তথা অসম চৰকাৰে পথটোৰ প্ৰতি দ্বায়িত্ব সামৰাৰ অভিযোগ উত্থাপিত হৈছে ৷
অভিযোগ অনুসৰি বছৰ বছৰ ধৰি মেৰামতি নকৰাৰ ফলত এতিয়া পথটোত প্ৰকাণ্ড গাঁতৰ সৃষ্টি হৈছে ৷ এনে দুৰৱস্থাৰ বাবে জিলাখনৰ থুৰামূখ, জুৰিয়া দলং , নামবৰ ৰিজাৰ্ভৰ মাজত নিতৌ সৰু-বৰ দুৰ্ঘটনা সংঘটিত হৈ থকাৰো অভিযোগ কৰে স্থানীয় ৰাইজে ৷ ইপিনে ৰাষ্ট্ৰীয় ঘাই পথটোত সৃষ্টি হোৱা গাঁতত সোমবাৰে কেইবাখনো বাহন সোমাই পৰাত বহু সময় ধৰি হাহাকাৰ অৱস্থাৰ সৃষ্টি হয় ৷
