গোৱালপাৰা, 28 ফেব্ৰুৱাৰী : হাতী মানুহৰ সংঘাতে ক্ৰমাৎ ভয়াৱহ ৰূপ ধাৰণ কৰিছে গোৱালপাৰা জিলাত ৷ বিগত বছৰটোত হাতী মানুহৰ সংঘাতৰ ফলত কেইবাজনো ব্যক্তিয়ে প্ৰাণ হেৰুওৱাৰ পাছত 2020 বৰ্ষত পুনৰ জিলাখনত সংঘটিত হৈছে হাতীৰ আক্ৰমণত এজনে ব্যক্তিয়ে প্ৰাণ হেৰুওৱাৰ ঘটনা ৷
ঘটনা অনুসৰি বৃহস্পতিবাৰে নিশা বনৰীয়া হাতীৰ এটা জাকে গোাৱলপাৰা জিলাৰ দহিকটা সংৰক্ষিত বনাঞ্চলৰ সোণাপুৰ গাঁৱত প্ৰৱেশ কৰি ৰাইজৰ বাৰীৰ ফল-মূলৰ গছ-গছনি খাই গাঁৱবাসীৰ মাজত আতংকৰ সৃষ্টি কৰে । সেই সময়তে মইনুল হক নামৰ এজন ব্যক্তিয়ে টোপনিৰ পৰা উঠি বাহিৰলৈ উলাই আহোতেই এটা বনৰীয়ে হাতীয়ে শুৰেৰে মেৰিয়াই ধৰি গচকি হত্যা কৰে ৷ কেৱল ইমানতেই ক্ষান্ত নাথাকি বনৰীয়া হাতীৰ দলটোৱে ভাঙি লণ্ড-ভণ্ড কৰে কেইবাটাও পৰিয়ালৰ বাসগৃহ ৷ উল্লেখ্য যে, গোৱালপাৰা জিলাৰ বিভিন্ন অঞ্চলত বনৰীয়া হাতীৰ জাকে এই ধৰণে সঘনে সন্ত্ৰাস চলোৱাৰ লগতে ইতিমধ্যেই বহুকেইজন ব্যক্তিৰ প্ৰাণ লোৱাৰ পাছতো পৰিস্থিত নিয়ন্ত্ৰণ কৰাত সম্পূৰ্ণ ব্যৰ্থ হৈছে বনবিভাগ ৷
