ডিমা হাছাও, 3 আগষ্টঃ ডিমা হাছাও জিলাত পথ দুৰ্ঘটনাত থিতাতে নিহত হয় এজন লোক । এই পথ দুৰ্ঘটনাটো সংগঠিত হয় লামডিং-শিলচৰ 27 নম্বৰ ৰাষ্ট্ৰীয় ঘাইপথৰ লাইলিঙত।
লাংটিং আৰক্ষী সূত্ৰে জানিব পৰা মতে, নগাঁওৰ পৰা শিলচৰ অভিমুখত যোৱা এখন এএচ-০১চিচি 2914 নম্বৰৰ টাটা মোবাইল বাহন সোমবাৰ দিনৰ ভাগত লাংটিং আৰু মাইবাঙৰ মাজত 27 নম্বৰ ৰাষ্ট্ৰীয় ঘাইপথৰ লাইলিংত নিয়ন্ত্ৰণ হেৰুৱাই বাগৰি পৰে ৷ উক্ত ঘটনাটোত থিতাতে নিহত হয় টাটা মোবাইলৰ হেণ্ডিমেন লক্ষ্মীধৰ দাস ৷ লগতে গুৰুতৰ ভাবে আহত হয় টাটা মোবাইল বাহন খনৰ চালকজন ।
ইপিনে দুৰ্ঘটনাৰ খবৰ পাই লাংটিং আৰক্ষী দুৰ্ঘটনাস্থলীত উপস্থিত হৈ গুৰুতৰভাবে আহত চালক জনক উদ্ধাৰ কৰি উন্নত চিকিৎসাৰ বাবে হাফলং অসামৰিক চিকিৎসালয়লৈ প্ৰেৰণ কৰে ৷ লগতে দুৰ্ঘটনাত মৃত্যু হোৱা লক্ষ্মীধৰ দাসৰ মৃতদেহ মৰণোত্তৰ পৰীক্ষাৰ বাবে আৰক্ষীয়ে হাফলং অসামৰিক হাস্পতাললৈ প্ৰেৰণ কৰে বুলি আৰক্ষী সূত্ৰই জানিবলৈ দিয়ে।
