ডিমা হাছাও, 21 অক্টোবৰঃ অৱশেষত 15 দিনৰ অন্তত উদ্ধাৰ নিপকোৰ দুই কৰ্মীৰ মৃতদেহ ৷ এনডিআৰএফ আৰু এছডিআৰএফ বাহিনীয়ে উদ্ধাৰ কৰিবলৈ সক্ষম হৈছে দুয়োটা মৃতদেহ । কপিলী পাৱাৰ হাউচৰ 2 নম্বৰ ফ্লোৰত মাটিৰ তলত উদ্ধাৰ হয় নিপকোৰ দুই গৰাকী কৰ্মচাৰীৰ মৃতদেহ । কিন্তু এতিয়াও সন্ধানহীন হৈ আছে নিপকোৰ আৰু দুই কৰ্মচাৰী ।
লগতে পঢ়কঃ কপিলী জলবিদ্যুৎ প্ৰকল্পত নিখোজ অভিযন্তাক উদ্ধাৰ
সোমবাৰে দিনত উদ্ধাৰ হোৱা দুয়োটা মৃতদেহ নিপকোৰ অভিযন্তা ৰবাৰ্ট বেইতে নামলাই আৰু জয়ছিং তিছোৰ বুলি জনাইছে উদ্ধাৰকাৰী বাহিনীয়ে । ৰবাৰ্টৰ ঘৰ উমৰাংছ'ত আৰু জয়ছিঙৰ ঘৰ কাৰ্বি-আংলং জিলাত বুলি জানিব পৰা গৈছে । ইতিমধ্যে দুয়োটা মৃতদেহ উমৰাংছ' আৰক্ষীক গটাই দিছে এনডিআৰএফ আৰু এছডিআৰএফ বাহিনীয়ে ।
উল্লেখযোগ্য যে, বিগত 7 অক্টোবৰত সংঘটিত হোৱা কপিলী জল বিদ্যুৎ প্ৰকল্পস্থলীৰ জল পৰিবাহী পাইপ লাইন বিস্ফোৰণৰ পিচতে সন্ধানহীন হৈ আছিল নিপকোৰ 4গৰাকী কৰ্মচাৰী ৷ বিস্ফোৰণৰ কাৰণে প্ৰতি চেকেণ্ডত 12500 কিলোমিটাৰ গতিবেগত অহা পানীৰ লগতে মাটি আৰু বালিৰ চেপাত পৰি সন্ধানহীন হৈ আছিল নিপকোৰ অভিযন্তা ৰবাৰ্ট বেইতে নামলাই, জয়ছিং তিছো, ৰাজু ৰেড্ডী আৰু প্ৰেমপাল বাল্মিকী নামৰ চাৰি গৰাকী কৰ্মচাৰী ।
লগতে পঢ়কঃ শ্বহীদ পদুম বাহাদুৰৰ পৰিয়াললৈ মুখ্যমন্ত্ৰীৰ 20 লাখ টকাৰ সাহায্য
অৱশেষত 15 দিনৰ অন্তত আজি দুই গৰাকী কৰ্মচাৰীৰ মৃতদেহ উদ্ধাৰ কৰিবলৈ সক্ষম হয় এনডিআৰএফ আৰু এছডিআৰএফ বাহিনীয়ে ৷ উদ্ধাৰকাৰী দলে সন্ধানহীন আৰু দুই কৰ্মচাৰীৰ উদ্ধাৰৰ ভাবে অভিযান অধিক তীব্রতৰ কৰি তুলিছে ।
