ডিমা হাছাও, 6 ডিচেম্বৰ: ডিমা হাছাও জিলাৰ পৰা ষষ্ঠ অনুসূচীৰ ক্ষমতা হ্ৰাস কৰাৰ ষড়যন্ত্ৰ আৰম্ভ কৰিছে বিজেপি দলে ৷ দেওবাৰে হাফলং কংগ্ৰেছ ভৱনৰ সন্মুখত বাবা চাহেব ভীমৰাও আম্বেদকাৰৰ মৃত্যু দিৱসত উপস্থিত থাকি এই মন্তব্য কৰে, কংগ্ৰেছ নেতা তথা উত্তৰ কাছাৰ স্বায়ত্ব শাসিত পৰিষদৰ সদস্য ডেনিয়েল লাংথাচাই ৷ ডেনিয়েল লাংথাচাৰ মতে, ডিমা হাছাও জিলাত পঞ্চয়ত ৰাজ প্ৰৱৰ্তন কৰাৰ ষড়যন্ত্ৰ আৰম্ভ কৰিছে বিজেপি চৰকাৰে ৷
তেওঁৰ অভিযোগ বিটিচিৰ নিৰ্বাচনী প্ৰচাৰ অভিযানত অংশ লৈ মন্ত্ৰী হিমন্তই কৈছিল বিটিচিত বিজেপিৰ চৰকাৰ শাসনত আহিলে পঞ্চয়তৰাজৰ ব্যৱস্থা প্ৰৱৰ্তন কৰা হ'ব ৷ ষষ্ঠ অনুসূচীৰ অন্তৰ্গত অসমৰ তিনিওখন জিলাতেই পঞ্চয়তৰাজৰ ব্যৱস্থা প্ৰৱৰ্তন কৰি বিজেপি চৰকাৰে ষষ্ঠ অনুসূচীৰ ক্ষমতা হ্ৰাস কৰিব বিচাৰিছে বুলি মন্তব্য কৰে নেতাগৰাকীয়ে ৷ আনহাতে কংগ্ৰেছ দলে কেতিয়াও ডিমা হাছাও জিলাৰ এনে ক্ষমতা হ্ৰাস কৰিব নিদিয়ে ৷ প্ৰয়োজনত তীব্ৰ আন্দোলন গঢ়ি তোলা হ'ব বুলি হুংকাৰো প্ৰদান কৰে তেওঁ ৷
লগতে পঢ়ক: অস্তিত্বৰ সংকটত নাওবৈচা হস্ত তাঁত প্ৰশিক্ষণ কেন্দ্ৰ
