ডিব্ৰুগড়, 22 অক্টোবৰ: পুনৰ পোহৰলৈ আহিছে শ্ৰমিক সৰবৰাহৰ ঘটনা । ৰাজ্যৰ বিভিন্ন প্ৰান্তত শ্ৰমিকক কাম দিয়াৰ প্ৰলোভন দি বহিঃৰাজ্যত নিৰ্যাতন কৰাৰ খবৰ ওলাই থকা সময়তে মৰাণতো ঘটিল অনুৰূপ ঘটনা । অৰুণাচলৰ আলঙৰ পৰা নিৰ্যাতনৰ বলি হৈ পলাই আহি মৰাণত উপস্থিত হ'ল 14 জনকৈ শ্ৰমিক (Workers fled Arunachal Pradesh and arrived in Moran) ৷
ঘটনাৰ বিৱৰণী অনুসৰি, চেপন ডোমৰদলং বৰুৱাহুলাৰ পৰা 16 জনকৈ যুৱকক মহেন্দ্ৰ গগৈ নামৰ এজন ব্যক্তিয়ে তিনিচুকীয়াত কাম দিয়াৰ প্ৰতিশ্ৰুতি দি লৈ গৈছিল অৰুণাচলৰ আলঙলৈ । মহেন্দ্ৰ গগৈ নামৰ ব্যক্তিজনে শ্ৰমিকসকলক নি হুছেইন নামৰ এজন ব্যক্তিক গতাই দিছিল । ইয়াৰ পাছৰে পৰা শ্ৰমিকসকলক কাম কৰোৱাৰ নামত নিৰ্যাতন চলোৱাৰ লগতে পাব লগা পইচাও আদায় দিয়া নাছিল (Assam workers tortured in Arunachal Pradesh) ।
উপায়ন্তৰ হৈ 14 জনকৈ শ্ৰমিক শুকুৰবাৰে সন্ধিয়া পলাই আহি মৰাণত উপস্থিত হয় । কিন্তু ইয়াৰে দুজন শ্ৰমিক ৰাজু ভেংৰা, বিকি নায়ক ঘুৰি নহাত সৃষ্টি হৈছে ৰহস্যৰ । দুই শ্ৰমিকৰ পৰিয়ালে চেপন আৰক্ষী থানাত দাখিল কৰিছে এজাহাৰ ।
শুকুৰবাৰে সন্ধিয়া মৰাণত উপস্থিত হোৱা 14 জনকৈ শ্ৰমিকক মৰাণ ৰাজ্যিক চিকিৎসালয়ত স্বাস্থ্য পৰীক্ষা কৰোৱাই চেপন আৰক্ষীয়ে । সমগ্ৰ ঘটনাই এতিয়া মৰাণত সৃষ্টি কৰিছে তীব্ৰ উত্তেজনা । কিয়নো শ্ৰমিকক লৈ যোৱা মহেন্দ্ৰ গগৈ নামৰ মধ্যভোগীজনে পূৰ্বেও মৰাণৰ বিভিন্ন ঠাইৰ পৰা শ্ৰমিকক প্ৰলোভন দি বহিঃৰাজ্যলৈ নি নিৰ্যাতন চলোৱাৰ গুৰুতৰ অভিযোগ উত্থাপিত হৈ আহিছে । শ্ৰমিক সৰবৰাহত জড়িত থকা এইজন মহেন্দ্ৰ গগৈৰ বিৰুদ্ধে আৰক্ষীয়ে কি ব্যৱস্থা গ্ৰহণ কৰে সেয়াহে লক্ষ্যণীয় হ'ব।
শেহতীয়াকৈ এনে এক ঘটনা সংঘটিত হৈছিল তিনিচুকীয়া জিলাৰ লিডুত ৷ পেটৰ তাড়ণাত কামৰ বাবে বঙাইগাঁও আৰু গোৱালপাৰৰ পৰা তিনি শ্ৰমিক গৈছিল সুদুৰ তিনিচুকীয়া জিলাৰ লিডুলৈ ৷ লিডুৰ মালৌ পাহাৰত চোৰাং কয়লা খান্দিবলৈ তিনি শ্ৰমিকক লৈ গৈছিল কয়লা মাফিয়াই ৷ কিন্তু কয়লা খনিত গেছ লিক হোৱাৰ ফলত তিনি শ্ৰমিকে মৃত্যুক সাৱটি ল’বলগীয়া হৈছিল (Ledo coal mine incident) ৷
তিনি শ্ৰমিকৰ মৃত্যুৰ পাছতে ৰহস্যজনকভাৱে এই ক্ষেত্ৰত শ্ৰমিককেইজনৰ মৃতদেহ মালিকপক্ষই গোপনে নিশাৰ ভিতৰতেই মাটিৰ তলত পুতি থোৱাৰ ভয়ংকৰ অভিযোগ উত্থাপন হৈছিল ৷ এইক্ষেত্ৰত তিনিচুকীয়া আৰক্ষীও তৎপৰতাৰে অভিযান চলাই মৃতদেহ মাটিত পুতি থোৱা অৱস্থাত উদ্ধাৰ কৰাৰ লগতে আটক কৰিছিল ৮ জনক (Three die in illegal coalmine at Ledo)।
লগতে পঢ়ক: লিডুৰ কয়লা খনিত মৃত্যু হোৱা আছমতৰ নিথৰ দেহ পালেহি ঘৰ
