মৰাণ,১১ মাৰ্চঃ পৰিৱৰ্তনৰ প্ৰতিশ্ৰুতি দি দিছপুৰ দখল কৰা বিজেপি চৰকাৰে চাৰিটা বছৰ পাৰ কৰিলে । কিন্তু মুখ্যমন্ত্ৰী জনৰ গৃহ জিলাতে উন্নয়ন বিচাৰি হাহাকাৰ কৰিব লগা হৈছে সাধাৰণ ৰাইজে । মুখ্যমন্ত্ৰী সৰ্বানন্দ সোণোৱালৰ গৃহভূমি মৰাণ আজিও সমস্যাৰ মাজতে জৰ্জৰিত । বৰ্তমানৰ বিধায়ক চক্ৰধৰ গগৈৰ পৰিৱৰ্তনৰ প্ৰতিশ্ৰুতি সমূহ যেন ৰাইজৰ বাবে প্ৰতিশ্ৰুতিৰ মাজতে সীমাবদ্ধ হৈ ৰ'ল । চাৰিটা বছৰ পাৰ হোৱাৰ পাছতো সমষ্টিটোৰ গ্ৰাম্যাঞ্চল উন্নয়ন কৰাত চৰম ব্যৰ্থ হ'ল বিধায়কজন।
মৰাণ বিধানসভা সমষ্টিৰ খোৱাং পঞ্চায়তৰ অন্তৰ্গত ৮ নং ৱাৰ্ড অৰ্থাৎ হালধিবাৰী মইনা গাঁও আজিও অৱহেলিত হৈ থাকিল । চাৰিটা বছৰে গাঁওবাসীৰ সমস্যাৰ খবৰ ল'বলৈ সময় নাপালে বিধায়কজনে । কেৱল মাত্ৰ ৰাজনৈতিক স্বাৰ্থ সিদ্ধিৰ বাবে কাম কৰা বিধায়কজনে চাৰিটা বছৰে গাঁৱখনৰ মূল পথটো নিৰ্মাণ কৰিব নোৱাৰিলে । বানবিধস্ত ৰাইজে মূল পথটোত শিল পেলাই ছাত্ৰ ছাত্ৰীৰ লগতে বেপাৰ বাণিজ্যৰ লগত জড়িত ৰাইজক কষ্ট লাঘৱ কৰিবলৈ বাৰে বাৰে অনুৰোধ কৰাৰ পাছতো বৰ্তমানলৈকে বিধায়কজনে ৰাইজৰ সমস্যাৰ প্ৰতি কোনো গুৰুত্ব নিদিলে ।
যোৱা বৰ্ষৰ বানপানীৰ সময়ত নাৱত উঠি বিধায়কজনে গাঁৱৰ সমস্যা বুজ লৈ ৰাইজক প্ৰতিশ্ৰুতি দিছিল বুঢ়ীদিহিং নদীৰ গৰাখহনীয়া ৰোধৰ ব্যৱস্থা কৰাৰ লগতে গাঁৱখনৰ মূল পথটোত শিল দিয়াৰ । কিন্তু ইয়াৰ পৰৱৰ্তী সময়ত ৰাইজে অনুৰোধ কৰাৰ পাছতো বিধায়কে নিজৰ প্ৰতিশ্ৰুতি ৰক্ষা নকৰিলে । মূল পথটো কোনো এখন চৰকাৰে নিৰ্মাণ কৰি নিদিয়াত বছৰ বছৰ ধৰি মইনা গাঁৱৰ ৰাইজে বোকা পানী গচকি যাতায়ত কৰি জীয়াতু ভুগি আহিছে । গাঁৱখনত সোমোৱাব নোৱাৰে ৰোগী কঢ়িয়াই নিয়া ১০৮ সেৱাৰ বাহন । এজাক বৰষুণৰ পাছতে বোকাময় হৈ পৰা মূল পথটো বাৰিষা খোজ কাঢ়িব নোৱাৰা হৈ পৰে । বাৰিষা ছাত্ৰ-ছাত্ৰী সকলে ২ কিলোমিটাৰ দূৰত চাইকেল থৈ বিদ্যালয় মহাবিদ্যালয়লৈ অহা যোৱা কৰিব লগা হয় । উন্নয়ন আৰু পৰিৱৰ্তনৰ ব্যাপক প্ৰচাৰ চলাই থকা সময়ত চৰকাৰী আঁচনিয়ে আজিও মুখ্যমন্ত্ৰীৰ গৃহ জিলাৰ গাঁৱসমূহকে ঢুকি নোপোৱা বিষয়টোৱে উন্নয়নৰ প্ৰকৃত ছবিখন যেন উদঙাই দিছে সাধাৰণ ৰাইজৰ সমুখত ৷
লগতে পঢ়কঃচাপৰৰ বাঙালডোবাত জব্দ অবৈধভাৱে মাটি কঢ়িওৱা ট্ৰেক্টৰ
