নাহৰকটীয়া, 12 জুন : প্ৰভুভক্তৰ প্ৰতি অগাধ প্ৰেম এজন আৰক্ষী বিষয়াৰ ৷ পদপথৰ প্ৰভুভক্ত কুকুৰ(Street Dog)ক প্ৰতিদিনাই আহাৰ যোগান ধৰে নামৰূপৰ আৰক্ষী বিষয়া নৱ কুমাৰ বৰা (Naba Kumar Bora)ই । প্ৰতি নিশাই পদপথত থকা এজাক প্ৰভুভক্ত(Street Dog)ক লৈ ব্যস্ত হৈ থাকে আৰক্ষী বিষয়া গৰাকীয়ে ।
‘কুকুৰ শৃগাল গৰ্দভৰো আত্মাৰাম, জানিয়া সবাকো পৰি কৰিবা প্ৰণাম’-এই বাক্যশাৰী সৰোগত কৰি প্ৰভুভক্ত ৰূপে পৰিচিত কুকুৰক সহায়ৰ বাবে আগবাঢ়ি আহিছে ডিব্ৰুগড় জিলা নামৰূপৰ উপ-আৰক্ষী অধীক্ষক নৱ কুমাৰ বৰা (Naba Kumar Bora) ৷ ক’ভিড (covid)ৰ দ্বিতীয় লহৰ প্ৰতিৰোধৰ বাবে ৰাজ্যত বলৱৎ হৈছে কঠোৰ সান্ধ্য আইন ৷ এনে প্ৰেক্ষাপটত পদপথত ঘূৰি ফুৰা কুকুৰ বিলাকেও খাদ্যৰ অভাৱত ভুগিছে । সেয়ে, মানৱতাৰ খাতিৰত পদ পথত অনাই বনাই ঘূৰি ফুৰা প্ৰভুভক্ত কুকুৰ(Street Dog) কেইটাৰ কথা ভাবি আগবাঢ়ি আহিছে নামৰূপৰ আৰক্ষী বিষয়া গৰাকীয়ে ।
পৃথিৱীত কেৱল মানুহে নহয় সকলো প্ৰাণীৰে সমানে জীয়াই থকাৰ অধিকাৰ আছে ৷ গতিকে সকলো জীৱকূলৰ প্ৰতি আমাৰ থাকিব লগা উদাৰ মনোভাৱ প্ৰকাশ কৰিলে আৰক্ষী বিষয়াজনে ।
ইফালে আৰক্ষী বিষয়াগৰাকীৰ এনে মহান উদ্দেশ্যক সহাঁৰি জনাই আগবাঢ়ি আহিল হেমন্ত গগৈ, প্ৰণৱ চক্ৰৱৰ্তীকে ধৰি নামৰূপৰ একাংশ সচেতন লোক । ইফালে প্ৰভুভক্তক খাদ্যসামগ্ৰী যোগান ধৰা এই কাৰ্য প্ৰতিদিনে চলাই নিব বুলিও প্ৰকাশ কৰিলে আৰক্ষী বিষয়াজনে ৷
