মৰাণ, ৮ অক্টোবৰ: টিংখাঙৰ প্ৰথমখন ঔদ্যোগিক প্ৰশিক্ষণ প্ৰতিষ্ঠানৰ আজি শুভ উদ্বোধন কৰা হয় । ঔদ্যোগিক প্ৰশিক্ষণ প্ৰতিষ্ঠানখন উদ্বোধন কৰে ১১৯ নং টিংখাং বিধানসভা সমষ্টিৰ বিধায়ক তথা উদ্যোগ, বাণিজ্য, ৰাজহুৱা প্ৰতিষ্ঠান আৰু সাংস্কৃতিক পৰিক্ৰমা মন্ত্ৰী বিমল বড়াই । এই উদ্বোধনী অনুষ্ঠানত আমন্ত্ৰিত অতিথি হিচাপে উপস্থিত থাকি ভাষণ প্ৰদান কৰে পেট্ৰ'লিয়াম, প্ৰাকৃতিক গেছ, শ্ৰম আৰু নিয়োগ দপ্তৰৰ কেন্দ্ৰীয় ৰাজ্যিক মন্ত্ৰী ৰামেশ্বৰ তেলীয়ে ।
টিংখাঙৰ কেকুৰীস্থিত এই ঔদ্যোগিক প্ৰশিক্ষণ প্ৰতিষ্ঠানখন স্বেচ্ছাসেৱী অনুষ্ঠান আইডিয়েল অভিযানক PPP MODE আৰ্হিত কাৰিকৰী শিক্ষাৰ প্ৰশিক্ষণ প্ৰদান কৰিবলৈ চৰকাৰৰ তৰফৰ পৰা অনুমতি প্ৰদান কৰা হৈছে । এই ঔদ্যোগিক প্ৰশিক্ষণ প্ৰতিষ্ঠানত ডিজেল মেকানিকেল, ফিটাৰ, ইলেকট্ৰিচিয়ান আৰু ইঞ্জিনিয়াৰিং এই চাৰিটা বিষয়ত প্ৰশিক্ষণ গ্ৰহণ কৰিব পাৰিব ।
মুঠ ২২৬ খন আসন থকা এই ঔদ্যোগিক প্ৰতিষ্ঠানৰ নামভৰ্তি প্ৰক্ৰিয়া ইতিমধ্যে আৰম্ভ হোৱা বুলি উল্লেখ কৰে স্বেচ্ছাসেৱী সংগঠন আইডিয়েল অভিযানৰ সভাপতি অপূৰ্ব বৰাই । তেওঁ পুনৰ কয় যে দৰিদ্ৰ সীমা ৰেখাৰ তলৰ ছাত্র ছাত্ৰীয়ে লাভ কৰিব বিনামূলীয়া শিক্ষাৰ সুবিধা ।
ইপিনে, এই প্ৰতিষ্ঠানৰ জৰিয়তে নিবনুৱা আগ্ৰহী ছাত্ৰ-ছাত্ৰীসকল যথেষ্ঠ উপকৃত হ'ব পাৰিব বুলি মন্ত্ৰী বিমল বড়াই সংবাদ মাধ্যমৰ আগত সদৰী কৰে । আনহাতে, এই ঔদ্যোগিক প্ৰতিষ্ঠানখন পৰিচালনাৰ দায়িত্বত থকা স্বেচ্ছাসেৱী সংগঠন আইডিয়েল অভিযানৰ সভাপতি অপূৰ্ব বৰাই উক্ত প্ৰতিষ্ঠানখনত কেনেদৰে ছাত্র- ছাত্ৰী সকলক প্ৰশিক্ষণ দিয়া হ'ব এই সন্দৰ্ভত মন্তব্য আগবঢ়ায় । পেট্ৰ'লিয়াম, প্ৰাকৃতিক গেছ, শ্ৰম আৰু নিয়োগ দপ্তৰৰ কেন্দ্ৰীয় ৰাজ্যিক মন্ত্ৰী ৰামেশ্বৰ তেলীয়ে এনে প্ৰতিষ্ঠানৰ জড়িয়তে ছাত্ৰ-ছাত্ৰীসকল যথেষ্ঠ উপকৃত হ'ব বুলি কয় ।
