নাহৰকটীয়া, 8 ফেব্ৰুৱাৰীঃ অসমৰ সমাজ জীৱনৰ চহকী কলা-কৃষ্টিৰে সমৃদ্ধ অন্যতম জনগোষ্ঠী হৈছে টাই ফাকে লোকসকল ৷ মূলতঃ ডিব্ৰুগড় আৰু তিনিচুকীয়া জিলাত বসতি থকা থেৰবাদী বৌদ্ধধৰ্মত বিশ্বাসী এইসকল লোকৰ মেজি জ্বলোৱা উৎসৱটিয়েই হৈছে মাইক’ চুম ফাই ৷ টাইফাকে ভাষাত মাইক’ চুম ফাইৰ অৰ্থ হৈছে শাৰী শাৰীকৈ সজোৱা খৰিৰ স্তুপ ৷ মাঘ মাহৰ পূৰ্ণিমালৈ এটা দিন বাকী থাকোতে আয়োজন কৰা মাইক’ চুম ফাই উৎসৱটি শুকুৰবাৰে উলহ মালহেৰে আয়োজন কৰা হয় নাহৰকটীয়াৰ ঐতিহ্যমণ্ডিত নামফাকেত ৷ জন বিশ্বাস অনুসৰি, মাঘী পূৰ্ণিমাৰ আগদিনা বুদ্ধই বৌদ্ধত্ব লাভ কৰাৰ লগতে ঘোষণা কৰিছিল তেওঁৰ পৰিনিৰ্বাণৰ ক্ষণ ।
উল্লেখ্য যে, নামফাকে হৈছে টাইফাকে লোকসকলৰ বসতিপূৰ্ণ ৰাজ্যখনৰ আটাইতকৈ বৃহৎ গাঁও ৷ এই নামফাকেতে আছে ৰাজ্যৰ সবাতোকৈ ডাঙৰ বৌদ্ধবিহাৰটি ৷ নামফাকেৰ কাষেদি বৈ যোৱা বুঢ়ীদিহিঙৰ বুকুত শুকুৰবাৰে নিশা জ্বলোৱা হয় পৰম্পৰাগ’ত মেজি ৷ দুদিন ধৰি চলিবলগীয়া এই উৎসৱৰ অংশ হিচাপে শনিবাৰে বৌদ্ধবিহাৰত বিশ্বশান্তিৰ বাবে প্ৰাৰ্থনাৰো আয়োজন কৰে ৷ আনহাতে, বৌদ্ধ ধৰ্মৰ ৰীতি অনুসাৰে সমজুৱাকৈ প্ৰদান কৰা হ’ব পঞ্চশীল নীতিও ৷
আৰু পঢ়কঃ বৰপেটাত ভুৱা কৃষকৰ নামত ব্যাপক কেলেংকাৰী
