ডিব্ৰুগড়, 10 জুলাই : অসম চিকিৎসা মহাবিদ্যালয় (Assam Medical College Hospital)ত অভিনৱ সংযোজন । ব্ৰেইন ষ্ট’কৰ বলি হোৱা ৰোগীৰ বাবে অসম চিকিৎসা মহাবিদ্যালয় (Assam Medical College Hospital)ত মুকলি কৰা হৈছে এখন হাইটেক (অত্যাধুনিক) বাহন । ষ্ট্ৰ'ক হোৱা ৰোগীৰ তাৎক্ষণিক চিকিৎসা হ’ব এতিয়া উজনিৰ অসম চিকিৎসা মহাবিদ্যালয়ত । দেশৰ চৰকাৰী চিকিৎসালয়ৰ ভিতৰত অসম চিকিৎসা মহাবিদ্যালয়েই হ’ল এনে অত্যাধুনিক বাহন থকা প্ৰথমখন চিকিৎসালয় ।
সমগ্ৰ দেশৰ বিভিন্ন আগশাৰীৰ চিকিৎসালয়সমূহৰ ভিতৰত অসম চিকিৎসা মহাবিদ্যালয়লৈ (Assam Medical College Hospital) আহিল এই অভিনৱ পদ্ধতি । আই চি এম আৰ (ICMR)ৰ দ্বাৰা প্ৰদান কৰা হৈছে এই বহুকোটি টকাৰ মূল্যৰ ম’বাইল ষ্ট্ৰ'ক ভেনখন । হাইটেক (অত্যাধুনিক) বাহনখনত চিটি স্কেনৰ লগতে আনুষাংগিক সকলো চিকিৎসা সঁজুলি মজুত আছে আৰু ইয়াৰ সহায়তে এতিয়া ৰোগীক তাৎক্ষণিক চিকিৎসা কৰা হ’ব ৷
দেশৰ ভিতৰতে চৰকাৰী চিকিৎসা কেন্দ্ৰত এইয়া হৈছে প্ৰথম সুবিধা । ইতিমধ্যে ব্ৰেইন ষ্ট্ৰ'ক হোৱা এগৰাকী ৰোগীক সফলতাৰে চিকিৎসা প্ৰদান কৰি প্ৰায় সুস্থিৰ কৰি তোলা হৈছে এই ষ্ট’ক ভেনৰ জৰিয়তে । বৰ্তমানে এই ভেনখন মেডিকেলৰ চৌহদৰ জৰুৰীকালীন বিভাগত ৰখা হৈছে ।
অসম চিকিৎসা মহাবিদ্যালয়ৰ অধ্যক্ষ ডাঃ সঞ্জীৱ কাকতিয়ে পোন প্ৰথমবাৰৰ বাবে মধ্য বয়সৰ এগৰাকী ৰোগীক ষ্ট’ক ভেনৰ জৰিয়তে চিকিৎসা প্ৰদান কৰা লগতে ৰোগীৰ অৱস্থা বৰ্তমান সুস্থিৰ বুলি জানিবলৈ দিয়ে । এতিয়াৰে পৰা কোনো ব্ৰেইন ষ্ট্ৰ'ক হোৱা ৰোগী ডিব্ৰুগড়ৰ মেডিকেললৈ নিদিষ্ট সময়ৰ ভিতৰত আহিলে সু-চিকিৎসাৰে আৰোগ্য লাভ কৰিব পাৰিব বুলি আশা প্ৰকাশ কৰে ডাঃ সঞ্জীৱ কাকতিয়ে ।
ডাঃ সঞ্জীৱ কাকতিয়ে সদৰি কৰা অনুসৰি থ্ৰ’মবলিলিছিছ চিকিৎসা পদ্ধতি তথা ষ্ট্ৰ’ক হোৱা ৰোগীৰ শিৰা বা উপশিৰাত গোট মৰা তেজ ঔষধৰ দ্বাৰা স্বাভাৱিক কৰা হয় । ফলত ৰোগীৰ জীৱন ৰক্ষা পৰাৰ লগতে ৰোগীক নিজৰ পদুলিত গৈ পংগুত্ব জীৱনৰ পৰা ৰক্ষা কৰিব পৰা যাব । স্নায়ুৰোগ বিশেষজ্ঞ ডাঃ বিনোদ শৰ্মা আৰু ডাঃ কমল ৰাজখোৱাসহ চিকিৎসকৰ এটা দলে স্বাভাবিকতেই এতিয়া এনে সেৱাই বহু ৰোগীৰ জীৱন ৰক্ষা কৰিব পৰা যাব বুলি আশা ব্যক্ত কৰে ।
লগতে পঢ়ক : দুই মন্ত্ৰীৰ বিভাগ সলালে মুখ্যমন্ত্ৰীয়ে
