ডিব্ৰুগড়, 7 এপ্ৰিল: সেনাৰ আতিশয্যৰ বাবে মানসিক বিকাৰগ্ৰস্তৰ জীৱন অতিবাহিত কৰা এজন সশস্ত্ৰ বিপ্লৱী৷ আজি কিছুদিন পূৰ্বে ইটিভি ভাৰত অসম যোগে সম্প্ৰচাৰিত হৈছিল ডিব্ৰুগড় জিলাৰ টেঙাখাত নখঙীয়া গাওঁৰ কুম্ভেশ্বৰ হাজৰিকা ওৰফে বিলু শইকীয়া নামৰ এই বিপ্লৱী গৰাকীৰ জীৱন গাঁথা৷ কিদৰে এসময়ৰ সশস্ত্ৰ সংগামীয়ে বিগত 30 বছৰে মহিলাৰ পোছাক পৰিধান কৰি মানসিক বিকাৰগ্ৰস্তৰ জীৱন অতিবাহিত কৰিছে সেই সম্পূৰ্ণ দৃশ্য বন্দী হৈছিল ইটিভি ভাৰতৰ কেমেৰাত৷
অৱশেষত আমাৰ এই বাতৰি সম্প্ৰচাৰ কৰাৰ পিছত কুম্ভেশ্বৰ হাজৰিকাৰ বাসগৃহত উপস্থিত হয় আলফাৰ আলোচনাপন্থী গোটৰ নেতা জীতেন দত্ত৷ আলফাৰ প্ৰতিষ্ঠাকালৰ সদস্য কুম্ভেশ্বৰ হাজৰিকাৰ চিকিৎসাৰ সম্পূৰ্ণ দ্বায়িত্ব গ্ৰহণ কৰে আলফা নেতাজনে৷ উল্লেখ্য যে, মানসিক ভাৰসাম্য হেৰুৱাৰ পাচতো নিজৰ সতীৰ্থ সকলক স্মৰণ কৰিবলৈ সক্ষম হৈছিল বিলু শইকীয়া ৷ লগতে ঘটনাটো পোহৰলৈ অনাৰ বাবে ইটিভি ভাৰতক ধন্যবাদ জ্ঞাপন কৰে আলফা নেতা গৰাকীয়ে৷
