ডিব্ৰুগড়, ৪ জুন: কৰ'ণাসৃষ্ট পৰিস্থিতিয়ে বৰ্তমান বহুতৰে জীৱনলৈ বিপৰ্যয় মাতি আনিছে । উপাৰ্জনৰ পথ বন্ধ হৈ পৰাত আৰ্থিক সংকটত ভূগিবলগীয়া হৈছে বহু লোকে । একে সময়তে দৈনিক শ শ লোক ক'ভিড-১৯ত আক্ৰান্ত হৈ আছে । বহুতেই হোম কোৱাৰেণ্টাইনত আছে ।
ঘৰৰ পৰা ওলাব নোৱাৰাৰ বাবে খাদ্যৰ নাটনি হৈছে এই লোকসকলৰ । শুকুৰবাৰে ডিব্ৰুগড়ৰ লাহোৱাল মণ্ডলৰ অন্তৰ্গত মোহনবাৰী গাঁও পঞ্চায়তৰ বাঁছ বাৰীত হোম কোৱাৰেণ্টেইনত থকা লোকসকলৰ মাজত চৰকাৰে বহন কৰা খাদ্য সামগ্ৰী বিতৰণ কৰা হয় । প্ৰায় ৫৪ টা পৰিয়ালক খাদ্য সামগ্ৰী যোগান ধৰা হয় । লাহোৱাল সমষ্টিৰ বিধায়ক বিনোদ হাজৰিকাই দলীয় কৰ্মীৰ সৈতে লগ হৈ এই খাদ্য সামগ্ৰীবোৰ বিতৰণ কৰে ।
লগতে গাঁওবাসীক ক'ভিড পৰীক্ষা কৰিবলৈ নিৰ্দেশ দিয়ে । বিধায়কগৰাকীক সংগ দিয়ে মোহনবাৰী পঞ্চায়তৰ সভাপতি ৰঞ্জন বৰুৱা, চক্ৰ বিষয়া সুজাতা গগৈ, মোহনবাৰী জিলা পৰিষদৰ সদস্যা ৰাণু গগৈ, মোহনবাৰী পঞ্চায়ত সম্পাদক উমা শৰ্মা, লাহোৱাল মণ্ডলৰ মহিলা মৰ্চা সভানেত্রী ববী শইকীয়া লগতে স্বাস্থ্য কৰ্মীৰ, ৱাৰ্ড মেম্বাৰ আৰু দলীয় কাৰ্যকতাসকল উপস্থিত থাকে ।
