নাহৰকটীয়াত জ্যেষ্ঠ ভাতৃৰ হাতত প্ৰাণ গ'ল ভাতৃৰ

পাৰিবাৰিক কন্দলৰ পৰিপ্ৰেক্ষিতেত প্ৰাণ গ'ল সীমান্ত গগৈ নামৰ এজন যুৱকৰ ৷ মৃত সীমান্ত গগৈৰ পিতৃ দিগন্ত গগৈয়ে এই ঘটনা আকস্মিকভাৱে সংঘটিত হোৱা বুলি উল্লেখ কৰি এয়া এক দুৰ্ঘটনা বুলি উল্লেখ কৰিছে ৷

নাহৰকটীয়া, 24 জুন : ৰাজ্যজুৰি অব্যাহত থকা ক'ভিডৰ ভয়াৱহতা তথা বানৰ মাজতে নাহৰকটীয়াৰ চাচনীৰ হালোৱা গাঁৱত সংঘটিত হৈছে এক চাঞ্চল্যকৰ হত্যাকাণ্ড ৷ প্ৰাপ্ত খবৰ অনুসৰি, বুধবাৰে নিশা সংঘটিত হয় এই চাঞ্চল্যকৰ হত্যাকাণ্ডটো ৷ পাৰিবাৰিক কন্দলৰ পৰিপ্ৰেক্ষিতেত প্ৰাণ গ'ল সীমান্ত গগৈ নামৰ এজন যুৱকৰ ৷ এই ঘটনাই সমগ্ৰ অঞ্চলটোতে সৃষ্টি কৰিছে তীব্ৰ চাঞ্চল্যৰ ৷

ঘটনাৰ বিৱৰণী অনুসৰি, বুধবাৰে নিশা হালোৱা গাঁৱৰ নিবাসী দিগন্ত গগৈয়ে একমাত্ৰ পুত্ৰ সীমান্ত গগৈৰ সৈতে ঘৰুৱা কাম-কাজৰ কথাক লৈ বাক-বিতণ্ডাৰ সৃষ্টি কৰে ৷ ঠিক তেনে সময়তে ঘৰৰ কাষতে থকা দিগন্ত গগৈৰ ভাতৃ প্ৰয়াত চেনিৰাম গগৈৰ পুত্ৰ তথা সীমান্ত গগৈৰ দদায়েকৰ পুত্ৰ ভাতৃ পুলিন গগৈ উপস্থিত হৈ কিহৰ বাবে হৈ-হাল্লা কৰা বুলি গালি-গালাজ পাৰি বুজনি দিয়াৰ চেষ্টা কৰে ৷ কিন্তু পৰিস্থিতি অধিক অৱনতি ঘটাত এডাল জেওৰা খুটিৰে সীমান্ত গগৈক প্ৰহাৰ কৰে ভাতৃ পুলিন গগৈয়ে ৷

দুৰ্ভাগ্যজনকভাৱে উক্ত জেওৰা খুঁটিটোৱে সীমান্ত গগৈৰ বুকু ভেদ কৰাত তৎক্ষণাত মাটিত ঢলি পৰে সীমান্ত গগৈ ৷ পৰিয়ালৰ লোকে লগে লগে সীমান্তক নাহৰকটীয়া অসামৰিক চিকিৎসালয়ত ভৰ্তি কৰে যদিও চিকিৎসকে সংকটজনক অৱস্থাত তেওঁক ডিব্ৰুগড় চিকিৎসা মহাবিদ্যালয়লৈ স্থানান্তৰ কৰে ৷ পিছত ডিব্ৰুগড়ত চিকিৎসকে যুৱকজনক ইতিমধ্যে মৃত বুলি ঘোষণা কৰে ৷

ইফালে মৃত সীমান্ত গগৈৰ পিতৃ দিগন্ত গগৈয়ে এই ঘটনা আকস্মিকভাৱে সংঘটিত হোৱা বুলি উল্লেখ কৰি এয়া এক দুৰ্ঘটনাজনিত ঘটনা বুলি মন্তব্য কৰে ৷ ইতিমধ্যে নাহৰকটীয়া আৰক্ষীয়ে অভিযুক্ত পুলিন গগৈক আটক কৰি তদন্ত অব্যাহত ৰাখিছে ৷ পাৰিবাৰিক সংঘাতৰ বাবেই এজন যুৱকে এনেদৰে অকাল মৃত্যুক সাৱটি ল’বলগীয়া হোৱাত অঞ্চলজুৰি সৃষ্টি হৈছে তীব্ৰ প্ৰতিক্ৰিয়াৰ ৷

লগতে পঢ়কঃ কৰ্মৰত অৱস্থাত সোৱণশিৰিত সন্ধানহীন যুৱক