মৰাণ, ৬ এপ্ৰিল: এইবাৰ কৃত্ৰিম বানে যাতে ডিব্ৰুগড় চহৰ প্লাৱিত কৰিব নোৱাৰে, তাৰ বাবে আগতীয়াকৈ ব্যৱস্থা গ্ৰহণৰ বাবে তৎপৰ হৈছে ডিব্ৰুগড় জিলা প্ৰশাসন । ডিব্ৰুগড় জিলা উপায়ুক্তৰ নিৰ্দেশ মৰ্মে মঙলবাৰে অতিৰিক্ত উপায়ুক্ত ক্ৰমে ৰঞ্জিত কোঁৱৰ, তপন কুমাৰ গোহাঁই আৰু জলসম্পদ বিভাগ আৰু ডিব্ৰুগড় পৌৰসভাৰ বিষয়াসকলে বানে প্ৰভাৱিত কৰা অঞ্চল পৰিদৰ্শন কৰে ।
বিশেষকৈ মাইজান, নতুনগাঁও, জালান চাহ বাগিচা আদি পৰিদৰ্শন কৰি বাৰিষা কেনেদৰে পানী পাম্পৰ জৰিয়তে সোনকালে নিষ্কাশন কৰিব পাৰি সেই সকলো ব্যৱস্থাৰ বিষয়ে বিষয়াসকলে বুজ লয় । ইতিমধ্যে, ডিব্ৰুগড় চহৰত পানী নিষ্কাষণৰ বাবে কেইবাটাও বৃহৎ পাম্প আহি পাইছেহি আৰু এই পাম্পসমূহ ক'ত কেনেকৈ সংস্থাপিত কৰা হ'ব তাৰ বিষয়েও বিষয়াসকলে চৰ্চা কৰে ।
মুঠতে বাৰিষা কৃত্ৰিম বানৰ কবলৰ পৰা ডিব্ৰুগড় চহৰৰ বাসিন্দাক ৰক্ষা কৰাৰ বাবে সু-ব্যৱস্থা গ্ৰহণৰ পৰিকল্পনা কৰিছে জিলা প্ৰশাসনৰ বিষয়াসকলে । প্ৰতি বছৰে কৃত্ৰিম বানে চহৰখনত অভাৱনীয় পৰিস্থিতিৰ সৃষ্টি কৰে । বাট-পথ পানীত বুৰ যোৱাৰ লগতে বাসগৃহৰে বাহিৰে-ভিতৰে পানীৰে উপচি পৰে ।
লগতে পঢ়ক:সপৰিয়ালে ভোটদান কৰিলে মন্ত্ৰী চন্দ্ৰমোহন পাটোৱাৰীয়ে
