ডিব্ৰুগড়, 30 মে': ডিব্ৰুগড় জিলাৰ উপায়ুক্ত পল্লৱ গোপাল ঝাই শনিবাৰে পৰিদৰ্শন কৰে নাহৰকটীয়া মহাবিদ্যালয়ত স্থাপন কৰা পৰিদৰ্শন কেন্দ্ৰটো । নাহৰকটীয়া ৰাজহ চক্ৰৰ অধীনৰ এই কোৱাৰেন্টাইন কেন্দ্ৰটো স্থাপন কৰা হৈছে বহিঃৰাজ্যৰ পৰা গৃহভূমি ডিব্ৰুগড়লৈ ঘূৰি অহা লোকসকলক কোৱাৰেন্টাইন কৰিবৰ বাবে ।
উপায়ুক্ত গৰাকীৰ লগত উপস্থিত থাকে নাহৰকটীয়া ৰাজহ চক্ৰৰ চক্ৰ বিষয়া বিক্ৰম ছেত্ৰী । দুয়োৱে পৰিদৰ্শনকালত কোৱাৰেণ্টাইন কেন্দ্ৰটোৰ দায়িত্বত থকা মহাবিদ্যালয়খনৰ অধ্যক্ষ আৰু তাত থকা লোকসকলৰ সৈতে মত বিনিময় কৰে ।
সম্প্ৰতি কেন্দ্ৰটোত 2 গৰাকী মহিলা সহ 41 গৰাকী বহিঃ ৰাজ্যৰ পৰা অহা লোক আছে । কেন্দ্ৰটোৰ পৰিষ্কাৰ-পৰিচ্ছন্নতা, সুৰক্ষা ব্যৱস্থা, খাদ্য যোগান ব্যৱস্থাপনা আদিৰো উপায়ুক্তগৰাকীয়ে বুজ লয় ৷
