মৰাণ, 25 ডিচেম্বৰ: ডিব্ৰুগড়ত ভাৰতীয় জনতা পাৰ্টীৰ উদ্যোগত অনুষ্ঠিত প্ৰয়াত প্ৰধানমন্ত্ৰী ভাৰতৰত্ন অটল বিহাৰী বাজপেয়ীৰ জন্মদিন উপলক্ষে অনুষ্ঠিত সু-শাসন দিৱসত অংশগ্ৰহণ কৰি কংগ্ৰেছক তীব্ৰ সমালোচনা কেন্দ্ৰীয় মন্ত্ৰী সৰ্বানন্দ সোণোৱালৰ । দুদিন পূৰ্বে কংগ্ৰেছে 60 বছৰত গৰীবি আঁতৰাব নোৱাৰিলে বুলি কটাক্ষ কৰা সোণোৱালে এইবাৰ পুনৰ কংগ্ৰেছক আক্ৰমণৰ লক্ষ্য কৰি লয় ৷
কেন্দ্ৰীয় মন্ত্ৰীজনে কয়, ‘‘কংগ্ৰেছে 20 লাখ কোটি টকা দুৰ্নীতি কৰাৰ বাবেই এতিয়া ধৰাশায়ী হৈছে । মানুহে কংগ্ৰেছৰ চৰিত্ৰ দেখিলে । কংগ্ৰেছে যিমান ডাঙৰ ডাঙৰ কথা ক'লেও, পদযাত্ৰা কৰিলেও ৰাইজে আৰু সুযোগ নিদিয়ে । ৰাইজে 60 বছৰ সুযোগ দিছিল কংগ্ৰেছক ৷ কিন্তু দৰিদ্ৰ জনগণৰ বাবে কংগ্ৰেছে একো কৰিব নোৱাৰিলে । দুৰ্নীতি কৰি শাসন ব্যৱস্থাটোকে ভাঙি-ছিঙি শেষ কৰিলে ৷ সেয়ে মানুহে তেওঁলোকক প্ৰত্যাখান কৰিছে আৰু কেতিয়াও গ্ৰহণ নকৰে । ইয়াৰ পৰিৱৰ্তে দেশৰ প্ৰধানমন্ত্ৰী নৰেন্দ্ৰ মোদীয়ে দেখুৱাই দিলে সততা আৰু নিষ্ঠাৰে কাম কৰিলে দেশত কিমান বৈপ্লৱিক পৰিৱৰ্তন আনিব পাৰি ।’’
ৰাজনৈতিক মহলত চৰ্চা চলিছে যে 2024 ৰ লোকসভা নিৰ্বাচনত লখিমপুৰ বা ডিব্ৰুগড়ৰ পৰা প্ৰাৰ্থিত্ব আগবঢ়াব সৰ্বানন্দ সোণোৱালে । যাৰ বাবে শেহতীয়াকৈ বিৰোধী কংগ্ৰেছৰ সমালোচনাত মুখৰ হৈছে কেন্দ্ৰীয় মন্ত্ৰীগৰাকী । পূৰ্বে সাংবাদিকে সুধি সুধি সৰ্বানন্দ সোণোৱালৰ মুখৰ পৰা উলিয়াব পৰা নাছিল ৰাজ্যৰ ৰাজনৈতিক মহলত আলোচনা হ’ব পৰা কথা । কিন্তু শেহতীয়াকৈ অন্য ৰূপত দেখা গৈছে কেন্দ্ৰীয় মন্ত্ৰী সৰ্বানন্দ সোণোৱালক ।
কংগ্ৰেছৰ লগতে আন বিৰোধী ৰাজনৈতিক দলৰ সমালোচনাই স্থান পাইছে সোণোৱালৰ ভাষণত । সোমবাৰে ডিব্ৰুগড়ত সৰ্বানন্দ সোণোৱালে বিৰোধী কংগ্ৰেছক তীব্ৰ সমালোচনা কৰা দেখা যায় । নিজৰ ভাষণৰ লগতে সাংবাদিকৰ সৈতে হোৱা বাৰ্তালাপতো কংগ্ৰেছৰ বিৰুদ্ধে সৰব হৈ পৰে কেন্দ্ৰীয় মন্ত্ৰী সোণোৱাল ৷
লগতে পঢ়ক: Su Sashan Divas celebrated: বাজপেয়ীক সুঁৱৰি সু-শাসন দিৱসত মোদীৰ জয়গান সোণোৱালৰ
