মৰাণ, 19 আগষ্ট : আজি গীতিকবি খ্যাত পাৰ্বতী প্ৰসাদ বৰুৱাৰ(Parvati Prasad Baruva)ৰ জন্ম বাৰ্ষিকী ৷ 1904 চনৰ 19 আগষ্টত শিৱসাগৰৰ দিখৌপাৰত জন্মগ্ৰহণ কৰিছিল এইগৰাকী কবিয়ে ৷ অসমীয়া সাহিত্য জগতত অমূল্য অৱদান আগবঢ়াই থৈ যোৱা পাৰ্বতী প্ৰসাদ বৰুৱা একেধাৰে কবি, গীতিকাৰ আৰু নাট্যকাৰ ৷
ক’ভিডৰ(Covid)ৰ ভয়াৱহ পৰিস্থিতিৰ বাবে আজি নিতাল-নিস্তব্ধ হৈ আছে গীতিকবিৰ সোণাৰিৰ সোণালীপাম ৷ এটি সংস্কৃতিৱান পৰিয়ালত জন্মগ্ৰহণ কৰা এইগৰাকী ব্যক্তিয়ে কৰ্মসূত্ৰে সোণাৰিৰ স্থায়ী বাসিন্দা হৈ জীৱনৰ সৰহখিনি সময় সোণাৰিতে কটাইছিল । প্ৰকৃতিৰ সৈতে খেলি এসময়ত ভাগৰি পৰি 1964 চনৰ 7 জুনত আমাৰ মাজৰ পৰা চিৰ বিদায় মাগিলে চিৰনমস্য কবিগৰাকীয়ে ৷
পাৰ্বতি প্ৰসাদ বৰুৱা আজি আমাৰ মাজত নাই যদিও তেওঁৰ সৃষ্টিৰাজিৰ চৰ্চা এতিয়াও অব্যাহত আছে । ক’ভিড পৰিস্থিতিৰ বাবে গীতিকবিৰ জন্মদিনটো আনুষ্ঠানিকভাৱে উদযাপন কৰিব পৰা হোৱা নাই ,যদিও প্ৰতিগৰাকী সংস্কৃতিৱান অসমীয়াই নিজ ঘৰতে থাকি সোঁৱৰণ কৰিছে ‘সোণালীপাম’ৰ বাসিন্দাগৰাকীক ।
উল্লেখ যে, সোণাৰিৰ সোণালীপামৰ নিগাজী ঘৰত বহিয়েই পাৰ্বতি প্ৰসাদ বৰুৱাই ৰচনা কৰিছিল জীৱনৰ চিৰসেউজ বহু গীত আৰু কবিতা ৷ চতুৰ্থখন অসমীয়া বোলছবি ‘ৰূপহী’ৰো স্ৰষ্টা আছিল গীতিকবি৷ সোণালীপামৰ নিগাজী ঘৰত থাকিয়েই নিভাঁজ অসমীয়া থলুৱা শব্দৰ গাঁথনি, থলুৱা সুৰ প্ৰয়োগেৰে ৰচনা কৰিছিল চিৰসেউজ গীত আৰু কবিতাসমূহ ৷
গুণগুণনি, লুইতী, শুকুলা ডাৱৰ ঐ কঁহুৱা ফুল, মায়াপী, মৌ টোকাৰী, ভঙা টোকাৰীৰ সুৰ, খেল ভঙাৰ খেল আদি পুথিৰ স্ৰষ্টা গীতিকবি পাৰ্বতি প্ৰসাদ বৰুৱাই ‘লখিমী’ আৰু ‘সোণৰ সোলেং’ নামৰ দুখন নাটৰো ৰচনা কৰিছিল ৷ 1961 চনত গোৱালপাৰাত অনুষ্ঠিত অসম সাহিত্য সভাৰ সংগীত সন্মিলনৰ সভাপতিৰ পদ অলঙ্কৃত কৰিছিল গীতিকবিয়ে । গীতিকবিৰ ওপজা দিনত তেওঁক শ্ৰদ্ধাৰে সুঁৱৰিছে অসমবাসীয়ে ৷
লগতে পঢ়ক : গো-পালনেৰে স্বাৱলম্বিতাৰ নিদৰ্শন উচ্চ শিক্ষিত যুৱকৰ
