নামৰূপ, 24 আগষ্টঃ নামৰূপ সাৰ-কাৰখানাত চলি আছে চৰম অৰাজকতা ৷ উত্তৰ-পূবৰ একমাত্ৰ সাৰ কাৰখানাৰ পৰা খিলঞ্জীয়াক খেদি পেটে-ভাতে মৰাৰ কূটিল ষড়যন্ত্ৰত লিপ্ত হৈছে অনা-অসমীয়া বিষয়া-কৰ্মচাৰী ৷ স্থানীয় যুৱক-যুৱতীক বঞ্চিত কৰি কাৰখানাটোত নিযুক্ত দি অহা হৈছে বহিৰাগত কৰ্মচাৰীক ৷ এই অভিযোগ আছুৰ ৷
2018 চনতে উদ্যোগটোত তৃতীয় আৰু চতুৰ্থ বৰ্গৰ কৰ্মচাৰীৰ বাবে 44টা পদত লিখিত পৰীক্ষা অনুষ্ঠিত হৈছিল ৷ কিন্তু আজিলৈকে সেই পৰীক্ষাৰ ফলাফল ঘোষণা নকৰিলে উদ্যোগটোৱে ৷ ইয়াৰ বিপৰীতে সময়ে সময়ে বহিৰাগত প্ৰাৰ্থীক সাৰ কাৰখানাত নিযুক্তি প্ৰদান কৰি আহিছে উদ্যোগটোৱে ৷
বৰ্তমানে উদ্যোগটোৰ পৰিচালন সঞ্চালক সঞ্জয় মহেশ্বৰীৰ অৱসৰৰ দিন উকলি যোৱাত পৰৱৰ্তী পৰিচালন সঞ্চালকৰ বাবে অসীম ঘোষ নামৰ এগৰাকী বিষয়াক বাছনি কৰা হৈছিল যদিও ৰহস্যজনকভাৱে আজিলৈ অসীম ঘোষৰ নিযুক্তি নহ'ল উদ্যোগটোত ৷
উদ্যোগটোৰ এনে কাৰ্যৰ প্ৰতিবাদতে স্থানীয় আছু গোটে শনিবাৰে প্ৰতিবাদ সাব্যস্ত কৰে ৷ স্থানীয় আছু কৰ্মীসকলে উদ্যোগটোৰ ঊৰ্ধতম কৰ্তৃপক্ষৰ লগতে সাৰ-মন্ত্ৰী সদানন্দ গৌড়া, কেন্দ্ৰীয় সাৰ মন্ত্ৰালয় আৰু কেন্দ্ৰীয় শ্ৰম আয়ুক্তলৈ স্মাৰকপত্ৰ প্ৰদান কৰে ৷
