মৰাণ,২৩ নৱেম্বৰ : আছু নেতাৰ টাৰ্গেট এইবাৰ মাছ বেপাৰী (Fish traders) । মাছৰ বেপাৰীৰ পৰা ধন দাবী কৰি ৰঙা ঘৰৰ আলহী আছু নেতা । হয় আপুনি ঠিকে শুনিছে । অসমীয়াৰ আৱেগ সদৌ অসম ছাত্ৰ সন্থাই (All Assam Student's Union) যেন সকলো মান-মৰ্যদা হেৰুৱাবলৈ আৰম্ভ কৰিছে । ধনদাবী যেন একাংশ আছু নেতাৰ এতিয়া একমাত্ৰ আহিলা । এইবাৰ চৰাইদেউ জিলাত সংঘটিত হ'ল তেনে এক ধনদাবীৰ ঘটনা ।
অভিযোগ অনুসৰি বৰহাটৰ পৰা নামৰূপ অভিমুখে গৈ থকা এখন মাছ ভৰ্তি বাহনৰ পৰা ৩০ হাজাৰ টকা দাবী কৰিছিল আছুৰ কেইগৰাকীমান নেতাই । বাহনখনে ধন দিবলৈ অমান্তি হোৱাত পুৱা ১০ বজাৰ পৰা বিয়লি ভাগলৈ মাছ ভৰ্তি বাহনখন আবদ্ধ কৰি ৰাখিলে আছু নেতাই । ফলত মাছসমূহ গেলিবলৈ আৰম্ভ কৰে । উপায়ন্তৰ হৈ মাছৰ বেপাৰীজনে আৰক্ষীৰ ওচৰত দাখিল কৰিলে আছুৰ বিৰুদ্ধে অভিযোগ । মাছ বেপাৰীৰ অভিযোগৰ ভিত্তিত নামৰূপ আৰক্ষীয়ে ৰুজু কৰিলে গোচৰ ।
ইতিমধ্যে ঘটনাৰ অভিযুক্ত দুই আছু নেতা ক্ৰমে নামৰূপ আছুৰ ভাৰপ্ৰাপ্ত সভাপতি সত্যপ্ৰতিম ৰাজপুত আৰু উপদেষ্টা তথা জিলা ছাত্ৰ সন্থাৰ শিক্ষা সম্পাদক মানসজ্যোতি চাংমাইক গ্ৰেপ্তাৰ কৰিছে আৰক্ষীয়ে । জানিব পৰা মতে মানসজ্যোতি চাংমাইয়ে পূৰ্বেও এই ধৰণৰ অনৈতিক কাৰ্যত লিপ্ত হৈছিল । যাৰ বাবে আছুৰ মজিয়াৰ পৰা নিলম্বিতও হ'বলগীয়াও হৈছিল চাংমাই ।
আছুৰ দৰে পৱিত্ৰ অনুষ্ঠানত থাকি এই ধৰণৰ কাৰ্যত লিপ্ত হোৱাক লৈ বহুতে গৰিহণা দিছে আছু নেতাসকলক । আৰক্ষীয়েও এই ক্ষেত্ৰত কঠোৰ ব্যৱস্থা লোৱাৰ ইংগিত দিছে । আনকি নামৰূপ আৰক্ষী থানাত বাতৰি সংগ্ৰহৰ বাবে যোৱা সাংবাদিককো একাংশ আছু কৰ্মীয়ে দুৰ্ব্যৱহাৰ কৰাৰ অভিযোগ উত্থাপন হৈছে । মুঠতে একাংশ দুৰ্নীতিগ্ৰস্থ নেতাই আছুৰ দৰে এটা পৱিত্ৰ অনুষ্ঠানক কলংকিত কৰা দেখা গৈছে । কিন্তু মুখ্য উপদেষ্টা ড: সমুজ্জল কুমাৰ ভট্টাচাৰ্যকে (Chief Advisor Samujjal Kumar Bhattacharya) ধৰি অসমৰ স্বাভিমান আছুৰ শীৰ্ষ নেতাসকলে সংগঠনটোৰ দুৰ্নীতিগ্ৰস্থ নেতাসকলৰ বিৰুদ্ধে অনুশাসনমূলক ব্যৱস্থা গ্ৰহণ কৰিব নে ? সেয়া সময়তহে লক্ষণীয় হ'ব ।
লগতে পঢ়ক :Maligaon murder Case : অৱশেষত গ্ৰেপ্তাৰ হ'ল হত্যাকাৰী বিকি সাহানী
