ধুবুৰী, 15 জুন: ধুবুৰীৰ ৰেডিঅ' টকিঅ' ইকিউপমেন্ট পাম্পত লিটাৰে লিটাৰে বিক্ৰী হৈছে পানীমিহলি পেট্ৰ'ল ৷ পেট্ৰ’ল ভৰাই গ্ৰাহকে নিজৰ নিজৰ গন্তব্যস্থলীলৈ গমন কৰে যদিও আধা বাটতে প্ৰায়ভাগৰে বিকল হৈ পৰে বাহনসমূহ । লগে লগে বাহনসমূহ মেৰামতি কৰিবলৈ গেৰেজলৈ লৈ যোৱা হয় ৷ ঠিক তেতিয়াই ওলাই পৰে ওৰহি গছৰ ওৰ (Water mixed petrol sold in petrol pump at Dhubri) ৷
অভিযোগ অনুসৰি, ধুবুৰীৰ শ্মশান মন্দিৰৰ নিচেই ওচৰতে থকা পেট্ৰল পাম্প এটাই বিগত কিছুদিনৰ পৰা গ্ৰাহকক পেট্ৰ’লৰ ঠাইত যোগান ধৰি আছে পানী ৷ পেট্ৰ’ল পাম্পটোৰ এনে কৰ্মকাণ্ডই সম্প্ৰতি গ্ৰাহকৰ লগতে সচেতন মহলত প্ৰতিক্ৰিয়াৰ সৃষ্টি হৈছে ৷ আনহাতে, পেট্ৰল পাম্পৰ কৰ্মচাৰীয়ে সমগ্ৰ ঘটনা স্বীকাৰ কৰি এয়া নেৰানেপেৰা বৰষুণৰ ফলত হৈছে বুলি দায়সৰা মন্তব্য কৰে ।
পিছে পানীত বুৰ নোযোৱা পেট্ৰ’ল পাম্পটোত কিদৰে পানী সোমাই পৰিল সেয়াই বৰ্তমানেও ৰহস্যৰ আৱৰ্তত ৷ ইফালে পানী মিহলি তেল ভৰোৱাৰ ফলত বিকল হৈ পৰা বাইকসমূহৰ ক্ষতিপূৰণ কোনে দিব তাকে লৈ সম্প্ৰতি গ্ৰাহকসকলৰ মাজত প্ৰতিক্ৰিয়াৰ সৃষ্টি হৈছে ।
লগতে পঢ়ক: ঠিকাদাৰক ধনী কৰাৰ বাবে চৰকাৰৰ ধন মই খৰচ কৰা নাছিলো: সিদ্ধাৰ্থ ভট্টাচাৰ্য
