ধুবুৰী, 2 আগষ্ট : ৰাজ্যত প্ৰতিদিনেই বৃদ্ধি পাই আহিছে ক'ভিড আক্ৰান্ত লোকৰ সংখ্য়া ৷ স্বাস্থ্য বিভাগ তথা প্ৰশাসন সকলো সময়তে সষ্টম হৈ থকাৰ পিচতো ৰোধ কৰিব পৰা নাই আক্ৰান্ত লোকৰ সংখ্যা ৷ ৰাজ্যৰ অন্য জিলাৰ লগতে ধুবুৰী জিলাতো কৰ'ণা ভাইৰাছে মহামাৰীৰ ৰূপ ধাৰণ কৰিছে ৷
শেহতীয়াকৈ জিলাখনত আক্ৰান্ত লোকৰ প্ৰতি লক্ষ্য ৰাখি প্ৰশাসনে 144 ধাৰা বলবৎ কৰিছে ৷ ধুবুৰী জিলাৰ জিলা দণ্ডাধীশে ভাৰতীয় ফৌজদাৰী দণ্ডবিধি আইনৰ 144 ধাৰাৰ অধীনত দেওবাৰে এক নিৰ্দেশনা জাৰি কৰিছে ৷ উক্ত নিৰ্দেশনা মৰ্মে দেওবাৰৰ পৰা কাৰ্যকৰী হোৱাকৈ সন্ধিয়া 6 বজাৰ পৰা পিচদিনা পুৱা 6 বজালৈ সমগ্ৰ ধুবুৰী জিলা বন্ধ ৰখাৰ নিৰ্দেশ প্ৰদান কৰিছে ৷ কেৱল প্ৰশাসন, স্বাস্থ্য বিভাগ, বা অত্যাবশ্যকীয় সামগ্ৰীৰ লগত জড়িত লোক সকলক এই ধাৰাৰ বাহিৰত ৰখা হৈছে ৷
উল্লেখ্য যে, দেওবাৰৰ দিনটোত ধুবুৰী জিলাত 12 গৰাকী লোকৰ দেহত ক'ভিড-19 পজিটিভ পোৱা গৈছে ৷ জিলাখনত সৰ্বমুঠ আক্ৰান্ত লোকৰ সংখ্যা হৈছেগৈ 1159 গৰাকী ৷ আনহাতে, বৰ্তমানলৈ জিলাখনত 774 গৰাকী লোক ক'ভিড মুক্ত হোৱাৰ লগতে 385 গৰাকী লোকৰ চিকিৎসা বৰ্তমানেও চলি থকা বুলি স্বাস্থ্য বিভাগে প্ৰকাশ কৰিছে ৷ একেদৰে জিলাখনত দেওবাৰে এগৰাকী 85 বছৰীয়া ক'ভিড ৰোগীৰ মৃত্যু হোৱাৰ তথ্য আহি পৰিছে ৷
ইফালে, জিলাখনত দেওবাৰৰ দিনটোতেই 114 গৰাকী লোকৰ নমুনা সংগ্ৰহ কৰা হয় ৷ জিলাখনত সৰ্বমুঠ 5 টা কোৱাৰেন্টাইন কেন্দ্ৰত 106 গৰাকী লোক থকা বুলি প্ৰশাসনে প্ৰকাশ কৰিছে ৷ প্ৰথমৰ পৰা এইপৰ্যন্ত জিলাখনত 32,730 গৰাকী লোকক কোৱাৰেন্টাইন কেন্দ্ৰৰ পৰা মুকলি কৰি দিয়া হৈছে ৷ একেদৰে জিলাখনৰ বিভিন্ন প্ৰান্তত সৰ্বমুঠ 9275 গৰাকী লোকক হোম কোৱাৰেন্টাইনত ৰখা হোৱা বুলি জানিব পৰা গৈছে ৷
লগতে পঢ়ক : COVID-19 সংক্ৰমণৰ শীৰ্ষত শোণিতপুৰ জিলা
