ধুবুৰী, 26 আগষ্টঃ ধুবুৰী চহৰৰ অলিয়ে গলিয়ে জাৱৰ জোথৰৰে ভৰি পৰাৰ ফলত এক দুৰ্গন্ধময় পৰিৱেশৰ সৃষ্টি হৈছে ৷ কিয়নো ধুবুৰী পৌৰসভাৰ প্ৰায় অৰ্ধ শতাধিক চাফাই কৰ্মচাৰীয়ে ধুবুৰী চহৰৰ মাজ মজিয়াত কৰ্ম বিৰতিৰে সাব্যস্ত কৰিছে প্ৰতিবাদ ৷
উল্লেখ্য যে কিছুদিন পূৰ্বে ৰবীন্দ্ৰ বাসফৰ নামৰ এজন বৃদ্ধ কৰ্মচাৰীক ধুবুৰী পৌৰসভা কৰ্তৃপক্ষই অস্থায়ী চাকৰিৰ পৰা অব্যাহতি দিয়ে ৷ যাৰ ফলত ক্ষুব্ধ হৈ পৰিছে পৌৰসভাৰ প্ৰতিজন চাফাই কৰ্মী। কাৰণ বৃদ্ধ গৰাকীক চাকৰিৰ পৰা অব্যহতি দিয়াৰ পিচত উপাৰ্জনহীন হৈ পৰিছে এটা পৰিয়াল। সেয়ে বাসফৰৰ এগৰাকী কন্যাক চাকৰি দিয়াৰ দাবীকে ধৰি আন চৰকাৰী কৰ্মচাৰীৰ দৰে পৌৰসভাৰ চাফাই কৰ্মীসকলক চৰকাৰী সুবিধা প্ৰদানৰ দাবীত চৌব্বিশ ঘন্টীয়া কৰ্ম বিৰতিৰে ধৰ্মঘট কাৰ্যসূচী ৰূপায়ণ কৰিছে ধুবুৰী পৌৰসভাৰ চাফাই কৰ্মী সকলে। ইপিনে বৃদ্ধ গৰাকীক চাকৰিৰ পৰা অব্যাহতি দিয়াৰ পিচত উপাৰ্জনহীন হৈ পৰা পৰিয়ালৰ শোকত বৃদ্ধ গৰাকীৰ মৃত্যু হ'লে কোন দায়ী হ'ব বা পৰিয়ালটোৰ দায়িত্ব কোনে বহন কৰিব বুলি প্ৰশ্ন উত্থাপন কৰে বৃদ্ধ বাসফৰৰ পত্নীয়ে।
