ধুবুৰী, 7 অক্টোবৰঃ প্ৰতিবছৰেই দুৰ্গাপূজাৰ সময়ত ৰাজ্যৰ প্ৰতিটো প্ৰান্তত পূজা মণ্ডপ নিৰ্মাণৰ ক্ষেত্ৰত চলে এক আঘোষিত প্ৰতিযোগিতা ৷ কোনোবাই যদি লাখ লাখ টকা ব্যয় কৰি নিৰ্মান কৰিছে পূজা মণ্ডপ কোনোবাই আকৌ সামান্য খৰচতেই চমক সৃষ্টি কৰিবলৈ সক্ষম হৈছে ৷ কোনোবাই যদি নৱ প্ৰজন্মৰ মাজত সজাগতা সৃষ্টি প্ৰয়াস কৰিছে। আন কোনোবাই আকৌ দাঙি ধৰিছে দেশ ভক্তিৰ অনন্য নিদৰ্শন ৷
ধুবুৰীৰ শান্তি নগৰ সাৰ্বজনীন দুৰ্গাপূজাত মূল পূজা মণ্ডপৰ কাষতে দেখুওৱা হৈছে দেশপ্ৰেমৰ অনন্য নিদৰ্শন ৷ জম্মু কাশ্মীৰৰ পুলৱামা আক্ৰমণত শ্বহীদ হোৱা ভাৰতীয় জোৱান সকলৰ আলোকচিত্ৰৰে এক বিশেষ শ্ৰদ্ধাঞ্জলি অনুষ্ঠান উপস্থাপন কৰা হৈছে এইখন পূজা মণ্ডপত ৷ আনহাতে ৰবীন্দ্ৰপল্লী সাৰ্বজনীন দুৰ্গাপূজা কমিটিয়ে নিৰ্মান কৰি উলিয়াইছে এক ব্যতিক্ৰমী পূজা মণ্ডপ ৷ এক প্ৰকাৰে কাৰ্টুন জগতত পৰিণত কৰা হৈছে এই পূজা মণ্ডপখনক ৷ মূল গেটৰ পৰা ভিতৰলৈকে কেৱল বিভিন্ন ধৰণৰ কাৰ্টুনেৰে সজাই তোলা হৈছে সমগ্ৰ মণ্ডপটো । টেৰাকটা শিল্প আৰু বিভিন্ন আকৰ্ষণীয় কার্টুনেৰে সাজি উলিওৱা এই মণ্ডপে সৰ্বসাধাৰণ ৰাইজৰ লগতে শিশু সকলৰ দৃষ্টি আকৰ্ষণ কৰিবলৈ সক্ষম হৈছে ৷
সমান্তৰালকৈ ধুবুৰীৰ তিনি নম্বৰ বালুৰ চৰ সাৰ্বজনীন দুৰ্গাপূজা কমিটিয়ে সম্প্ৰতি নৱ প্ৰজন্মই আসক্ত হৈ পৰা এণ্ড্ৰইডৰ মোবাইল আৰু ড্ৰাগছৰ প্ৰতি সচেতনতা সৃষ্টি কৰাৰ প্ৰয়াসেৰে সাজি উলিয়াইছে এখন বিশেষ পূজা মণ্ডপ ৷ আনহাতে ধুবুৰীৰ সবুজ সংঘ আৰু ধুবুৰী আৰক্ষী চাউনি খেল পথাৰৰ সাৰ্বজনীন দুৰ্গাপূজায়ো আকৰ্ষণ কৰিবলৈ সক্ষম হৈছে দৰ্শকৰ দৃষ্টি ৷ তামিলনাডুৰ মিনাক্ষী টেম্পেলৰ আৰ্হিত তৈয়াৰ কৰা হৈছে সবুজ সংঘৰ দুৰ্গা মণ্ডপ ৷ লগতে মণ্ডপৰ সন্মুখত ৰাজ্যৰ সবাতোকৈ ক্ষুদ্ৰতম চাবোনৰ মূৰ্তিৰ লগতে আন বহু শিল্পকলা প্ৰদৰ্শনীৰো ব্যৱস্থা কৰা হৈছে ৷
