ধুবুৰী,৪ মেঃ ধুবুৰী লোকসভা সমষ্টিৰ মুঠ ৫টা ভোটগ্ৰহণ কেন্দ্ৰত পুনৰ ভোটগ্ৰহণৰ নিৰ্দেশ দিছে নিৰ্বাচন আয়োগে ৷ এক সংবাদমেল যোগে এই কথা ঘোষণা কৰে ধুবুৰী জিলাৰ উপায়ুক্ত অনন্তলাল জ্ঞানীয়ে । সেই অনুসৰি, অহা ৬ মে'ত পুৱা ৭ বজাৰ পৰা বিয়লি ৫ বজালৈ ধুবুৰী লোকসভা সমষ্টিৰ মুঠ ৫টা ভোটগ্ৰহণ কেন্দ্ৰত পুনৰ অনুষ্ঠিত হ'ব ভোটগ্ৰহণ । পুনৰ ভোটগ্ৰহণ হ'বলগীয়া কেন্দ্ৰ কেইটা হ'ল - মানকাচৰ বিধানসভা সমষ্টিৰ বাউসকাটা এম ই মাদ্ৰাছা (বাওঁফাল), দক্ষিণ শালমাৰাৰ কাটলিপাৰা এম ই মাদ্ৰাছা আৰু লাওখোৱা এল পি স্কুল, ধুবুৰীৰ বাণী বিদ্যা মন্দিৰ এল পি স্কুল (সোঁফাল) আৰু গোলকগঞ্জ বিধানসভা সমষ্টিৰ নৱ ভাৰত পাঠশালা হাইস্কুল ৷
আনহাতে,গোলকগঞ্জৰ নবভাৰত পাঠশালা হাইস্কুল ভোটকেন্দ্ৰৰ আব্দুল কাদেৰ শেখ নামৰ এজন প্ৰিজাইডিং বিষয়াক কৰ্তব্যত গাফিলতিৰ অভিযোগত নিলম্বন কৰাৰ বাবে নিৰ্বাচন আয়োগে ধুবুৰী উপায়ুক্তক নিৰ্দেশ দিয়াৰ লগতে বাণী বিদ্যা মন্দিৰ এল পি স্কুল ভোট কেন্দ্ৰৰ প্ৰিজাইডিং বিষয়া গৌৰ প্ৰসাদ বৰ্মণৰ বিৰুদ্ধে আইনী ব্যৱস্থা গ্ৰহণৰ বাবে নিৰ্দেশ দিছে নিৰ্বাচন আয়োগে ।
