ধুবুৰী, 16 এপ্ৰিলঃ তৃতীয় পৰ্যায়ৰ নিৰ্বাচনলৈ মাজত কেইটামান দিন বাকী থকাৰ সময়তে ধুবুৰীত তুংগত উঠিছে নিৰ্বাচনী প্ৰচাৰ । এইবাৰ আমাৰ অস্তিত্বৰ যুজঁ হ’ব বুলি মন্তব্য কৰি পুনৰ ভয় ভীতিৰ ৰাজনীতি আৰম্ভ কৰি আজমলে কয় পুনৰ নৰেন্দ্ৰ মোডী চৰকাৰ গঠন হ’লে আপোনালোক বাংলাদেশ যাব লাগিব । মোডীক আসনচ্যুত কৰিব পাৰিলে স্ব:দেশত থাকিব পাৰিব বুলি ৰাইজক উদ্দেশ্যি ভাষণ প্ৰদান কৰে আজমলে । আনহাতে কংগ্ৰেছৰ সৈতে এঘাৰ খন আসন বুজাবুজি তথা মিত্ৰতা হোৱাৰ প্ৰসংগ উত্থাপন কৰি কংগ্ৰেছে প্ৰতাৰণা কৰিলে বুলিও ক্ষোভ প্ৰকাশ কৰে আজমলে । কংগ্ৰেছে আজমলক টাৰ্গেট কৰি লৈছে ৷ কিন্তু কংগ্ৰেছে প্ৰক্ষেপ কৰা শক্তিশালী প্ৰাৰ্থী শক্তিশালী নহয় বুলি কৈ আবু তাহেৰ বেপাৰী এজন বিজেপি প্ৰাৰ্থী বুলি ভাষণত উল্লেখ কৰে নেতাগৰাকীয়ে ।
ইপিনে ধুবুৰীৰ আন এখন নিৰ্বাচনী সভাতে মোডী আৰু হিমন্তক তুলাধূনা দিলে এ আই ইউ ডি এফ প্ৰধান বদৰুদ্দিন আজমলে । মন্ত্ৰী হিমন্তৰ নৃত্যৰ প্ৰসংগ উপস্থাপন কৰি আজমলে ক’লে হিমন্ত বৰ্তমান ৯৫% পাগল হৈছে আৰু নিৰ্বাচনৰ পিচত ১০০% পাগল হ’ব ৷ নিৰ্বাচনৰ পাচত সম্পূৰ্ণ নিজা খৰচৰে হিমন্তক তেজপুৰত ভৰ্তি কৰাই চিকিৎসা প্ৰদান কৰিব বুলি কটাক্ষ কৰে আজমলে ৷ মঙলবাৰে ধুবুৰীৰ ধৰ্মশালাত এখন দলীয় নিৰ্বাচনী সভাত হেলিকপ্টাৰ লৈ উপস্থিত হৈ নিজৰ ভাষণত হিমন্তক এইদৰে সমালোচনা কৰাৰ সমান্তৰালকৈ তীব্ৰ বাক্যবানেৰে আক্ৰমণ কৰে নৰেন্দ্ৰ মোডী আৰু অমিত শ্বাহক ।
উল্লেখ্য যে, যোৱা কেইবাদিনৰ পৰা এ আই ইউ ডি এফৰ মূৰব্বী তথা প্ৰাৰ্থী বদৰুদ্দিন আজমলে ধুবুৰীৰ আকাশত হেলিকপ্টাৰ উৰুৱাই সৃষ্টি কৰিছে নিৰ্বাচনী চমক । মঙলবাৰে ধুবুৰীৰ ধৰ্মশালা, বিৰসিং চৰ আৰু দুমৰদহ অঞ্চলত তিনিখনকৈ সভাত অংশ গ্ৰহণ কৰি নিজৰ নিৰ্বাচনী প্ৰচাৰ চলোৱাৰ লগতে ৫ নং কোকৰাঝাৰ লোকসভা সমষ্টিৰ হাউৰিয়াপেটত ইউ পি পি এলৰ হৈ নিৰ্বাচনী প্ৰচাৰ চলায় বদৰুদ্দিন আজমলে ।
